Underwood-i’n tlang leh nêm tho si a comment tum

American Idol season 4 winner, Carrie Underwood chu American Idol season 25-ah Katy Perry hmun ruak luahin Idol judge a ni dawn tih an lo puang tawh a, Underwood chuan, “Ka ngaihdan tlang taka sawi a, insiamthatna tur kawhhmuh chungin, nëm tak chung siin ka tih theih ka ring. Chu chu pawimawh ka tih pawh a ni, miin an beisei ram an rawn bawh a, chumite chanchinah chuan i tel ve tawh dawn a ni,” a ti.
Katy Perry hian rimawi khawvela music thar tihchhuah leh tan tawh tumin, American Idol judge a chawlhsan a, a chawlh thu a puan hnu rei vak loah Carrie Underwood, kum 41, chu Idol judge tur a nih thu an puang zui ve leh nghal a ni. Underwood hi 2005 khan American Idol season 4 winner a ni a, American Idol audition-a a inlan atanga kum 20 dawn hnuah judge a ni dawn ta a ni. Underwood hi Luke Bryan leh Lionel Richie te nen judging panel-ah an thuho dawn a ni.
AI judge tur chungchanga an kawmnaah Underwood chuan, “Country music atanga chawr chhuak ka ni hi vannei ka inti a, chutihrualin genre dang leh music-ah pawh a peng hrang hrang ka dai ve tho a. Tunah pawh Papa Roach nen hla kan buaipui mek a. A nuam kan ti khawp mai. Huapzo ve tak ni turah ka inngai a, audition-a an rawn inlanin, a music a zirna lo bihchianna tur pawh nei thei zel turah ka inngai a ni,” a ti.
Lionel Richie pawhin Underwood a thawhpui tur chu phurawm a tih thu sawiin, “Hei chu thil awmze nei tak a ni. Ngaiah kan lo neih tawh ang kha a ni dawn lo. Chanchin ropui tak nei, American Idol chhul chhuak ngei a ni, Judge tha tak a ni, ‘I dinhmun kan hrethiam,’ ti a han sawifiah tum ngial pawh a ngai hranpa lo. Artist kan nih ang chuan dinhmun leh awmdan hriatthiamna kan nei thin, mahse, a intihsiakna ‘American Idol’ stage-ah kan luhchilh ve tlat lo. Ani chu khatah khan a lo ding tawh a, a tih vek tawh hnu a ni tlat,” a ti.