Union MoS-in ZMC&H a tlawh
Ministry hnuaia hmalakna en tel
Zan khat riaka Mizoram rawn tlawh Union minister of state for Women & Child Development Savitri Thakur chuan Ningani khan Zoram Medical College & Hospital tlawhin, Aibawk RD Block-a hnathawh thenkhat a en bawk.
ZMC&H ah hian dean Prof Swati M. Patki hoin an lo dawngsawng a. Hma an sawnna, mipui hriselna atana hma lak dan leh zirna chungchang an sawiho. Damlo enkawl leh hriselna lama harsatna an lo thlen bawk.
Mizorama sawrkar hmalaknaah tlawmngai pawl, kohhran leh a dangte tha thawhna leh thawhhona chu ropui a tih thu Savitri Thakur hian a sawi a ni.
Hemi hnu hian ZMC&H building sak mek a en a, ZMC chhunga Creche (Child Care Centre) tlawhin, Ministry of DoNER hnuaia NESIDS (OTRI) Scheme-a thawh residential hostel pahnih, mi 82 ve ve awm theihna a tlawh bakah Hospital chhunga Emergency department, Obstetrics, Gynaecology Ward, Paediatrics Ward, SNCU leh NICU a fang bawk.
Union MoS hian Aibawk BDO office tlawhin, PHE leh RD department tangdunin Plastic Management Unit an siam chu a tlawh. Aibawk Anganwadi Centre-III a tlawhnaah naute kalten an dawn thin – take home ration, hot cook meal leh Saksham Anganwadi & Poshan 2.0 hnuaia Anganwadi Centre tihchangtlunna RO water filter, LED TV, ECCE kalpui dan leh naupang infiamna hmanraw chi hrang hrang a en a ni.
Kum 2024-a sak zawh Panchayat Bhawan Aibawk a tlawh a, mirethei in sak – PMAY (Gramin) tanpuina luah luh tawh a en a, MGNREGA hnuaia kawng siam a en bawk.
Hemi hnu hian Mizoram chhuahsan turin Lengpui Airport a pan nghal a ni.
Union MoS-in ZMC&H a tlawh Ministry hnuaia hmalakna en tel
Get real time updates directly on you device, subscribe now.