United in Chelsea an hneh

Inrinni zana English Premier League match ngaihven hlawh takah Manchester United chuan an mikhual Chelsea an hneh. Old Trafford-ah harsa taka an chak vangin United manager Reuben Amorim dinhmun a him rih. United an chak rual hian season kal meka khel tha Crystal Palace an khel tha tluang a, West Ham lakah hnehna an chang ve bawk.
Chelsea an vanduai
Old Trafford-ah beisei anga season bul tan tha tawk lo pahnih; Manchester United leh Chelsea ten inkhel hmuhnawm an lantir. Team lian laka tlawm zawn United in chak an mamawh hle a, Chelsea lakah chak ngei tumin tan an khawh nasa viau bawk. Mikhual an nihna hmunah chak tum viau ma se Chelsea an vanduai a, goalkeeper Robert Sanchez hnawhchhuah a nih bakah chawlhlawk hmain an player pawimawh Cole Palmer lakchhuah a ngai dawn. An tum fuh lohna inkhelah hian uiawm takin an tlawm zui ta chiah bawk.
Inkhel ngaihven hlawh takah hian inkhel tan atanga minute ngana lekah Chelsea si nghak Robert Sánchez chu box pawnah United forward Bryan Mbeumo a tihtluk vangin hnawhchhuah a ni. Sanchez hnawchhuah a nih vangin si nghak dang an luh a ngai. Si nghak Estevao Willian chuan forward pawimawh Pedro Neto a thlak. Neto awm lovin Chelsea tlarhma a bil leh zual a, hma takah kim lo zawk an nih vangin Chelsea tan Old Trafford-ah chet a har zui viau. Kim lo zawk an nih tawh sa nak laiin an player pawimawh Cole Palmer chu minute 21-na lekah hliam vangin lakchhuah a ngai zui leh a, Chelsea hmabak a khirh tak zet tawh.
Sanchez hnawhchhuah a ni a, tam zawk an nih vangin United hian na takin an khingpuite an nawr zui nghal a, goal pawh an thun thuai. Minute 7-naah Bruno Fernandes chuan hnaite atangin hmahruaina goal a thun. Fernandes goal in United a fuih phur leh zual a, Old Trafford-ah hmuhnawm takin an inlan. Phur taka inlan United tan hian midfieler Casemiro chuan minute 37-naah hnaite atanga tauh goal in an goal hnihna a thun zui leh a, an hmahruaina a tizau. United goal hnihna thuntu Casemiro hi chawlhlawk dawn hnaih minute 45+3-ah hnawhchhuah a ni ve thung.
Player 10 ve ve an nih tak vangin chawlhlawk hnu lamah Chelsea an phur thar a, inrintawkna sang zawk nen an inlan theih phah. Chelsea hian goal thun tumin tan an khawh nasa hle a, hun tawp dawn hnaihah an vannei ta nge nge. Hun tawp dawn hnaih minute 80-naah Trevoh Chalobah chuan Reece James ball vawrh luh tha tak chu fuh zetin a tauh goal a, an si phurh a sut then. An si phurh an sut hnuin tlawm pumpelh tum viau mah se Blues in goal an thun belh thei tawh lova, an elpui lian United lakah uiawm takin an tlawm zui ta a ni.
Chelsea lakah an chak vangin United in hma an sawn a, khelh nga atanga point 7 hmuin 14-na atangin 10-naah an invawrh sang. Team lian Chelsea lakah an chak vangin inrintawkna leh phurna sang zawk nen an inlan zui thei dawn a, hma lam an pan zel a beiseiawm. United lakah an tlawm vangin season thara a vawi khat nan Chelsea an tlawm. Blues hian khelh nga atanga point 8 hmuin pariatnaah an awm a, United chungah an la awm zui zel.
Chelsea hian inrinni zanah 17-naa awm mek Brentford an hmachhawn zui leh ang a. Chelsea in 14-naa awm mek Brighton chu Stamford Bridge-ah an mikhual ve thung ang.
Palace in hma lam an pan zel
Inrinni zana inkhel dangah season thara khel tha, tlawm nei lova kal tluang mek Crystal Palace chu table hnuai lama awm West Ham United hmachhawn turin London Stadium-ah an leng lut. An lenluhna mualah 2-1 in hnehna an chang a, top 4 huangah an inhlangkai.
London Stadium-ah Crystal Palace an khel tha hle viau a, chawlhlawk dawn hnaih minute 37-naah Jean-Philippe Mateta chuan hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah chak mamawh West Ham in bul an tan tha a, goal an thun thuai. Second half tan atanga minute lina lekah Jarrod Bowen chuan goal thunin an si phurh a sut. Hammers hian an mualah point hmuh tum viau mah se an puitlin zo lo. Mikhual team Palace tan ‘Tyrick Mitchell chuan minute 68-naah hma an hruai nawn lehna goal a thun. Mitchell goal thun hi hun tawp thlenga venghimin an chakpui a, point thum hlu tak an hmu zui ta a ni.
2-1 a West Ham hnehntu Crystal Palace hian season tharah vawi nga khel tawhin tlawm an la nei lo. Vawi hnih chakin draw vawi thum an nei tawh a, point 9 hmuin palinaah an awm mek. Palace in tha taka season bul an tan laiin West Ham erawh an talbuai ve thung. Hammers hian season tharah vawi nga khel tawhin vawi khat chiah an chak a, tlawm zawkah vawi li ngawt an tang tawh. Khelh nga atanga point thum chauh an la hmuh vangin tlahniam thei dinhmunah an ding mek. Bul an tan chhiat em vangin an manager Graham Potter dinhmun a derthawng sawt hle a. West Ham hian manager thar an nei thuai a nih pawhin a mak lo ang. Hammers hian Potter hmunruak luahtu tura an duh zawng hming an tarlang tan hial tawh a ni.