UNO-ah ZORO palai an kal
UNO Headquarters Geneva Switzerland-ah July 14-18 inkar khan 18th Expert Mechanism on the Rights Of Indigenous People (EMRIP) session neih a ni a. Zo Reunification Organisation hmingin Zo hnam aiawh palai 6 an kal.
UN EMRIP session-ah hian khawvel ram hrang hrang atangin mi 777 an kalkhawm a. Indigenous kaihhnawih agenda 9 sawiho a ni.
ZORO hian panel no.11 (agenda) “proposal to submitted to the Human Right Council for its to consoderation and approval” hmangin Zofate harsatna tawh mek memorandum thehluh a nih bakah sawichhuah a ni a. ZORO general secretary Lalnunfela Chawngthu chuan, India leh Myanmar leh Bangladesh sawrkar chu UNDRIP 2007 pawmtu leh signatory ni mah se, tuna an chet dan thlirin, UNDRIP 2007 an bawhchhe nasa hle tih a sawi a ni.
“UNDRIP article no. 7,8,9,10,36 sawi angin, indigenous mite dikna chanvo, ram humhalh leh zalen taka inkalpawh min remtih lai a, India sawrkarin boundary hung a tum hi kan pipute atanga kan ram a nih tlat vangin keini chuan international boundary-ah kan pawm loa, village boundary-a kan ngaih tlat avangin kan remti lo a ni,” a ti.
Bangladesh sawrkarin Zofate chenna Chittagong Hills Tract chhuh a tum avanga harsatna tawh dan, Manipur sawrkar leh Meitei mipuiin Zofate chenna an it avanga buaina chhuak chu UNDRIP article no.25 & 26 bawhchhiatna a ni tih ZORO general secretary hian sawiin, tunah Myanmar Zofa refugee nuai hnih vel India ramah harsa takin an awm a. Ramdanga refugee-a an chhuahna turah India sawrkarin mimal tinah exit fee Rs 50000 a phut a, hei hian harsatna nasa tak a thlen tih a sawi bawk.
Heng harsatna hi a rang thei ang bera ngaituah sak turin UN Human Rights Council an ngen tih a sawi.
“Ram hrang hrangah Zofate raltlanin kan awm a, kan hnam inchhinchhiahna atan ZORO chuan Zofa zawng zawng kan vaia angkhata kan hman tur ID a buatsaih a. 18th EMRIP session 2025 hian min nem ngheh sak a, khawvel ram hrang hrangin kan hnam inchhinchhiahna ID atan min lo pawmsak turin kan ngen bawk a ni,” Lalnunfela hian a ti.
Get real time updates directly on you device, subscribe now.