UNRWA talbuai nasa, ngenna siam hial

UN agency for Palestinian refugees, UNRWA hotu lu ber chuan Gaza tanpuina pe thin ramte tun hnaia titawpte chu ngaihtuah nawn leh turin a ngen.
Gaza Strip a mihring cheng maktaduai hnih chuangte chu an tanpuina peka innghat liau liau an ni, tiin Philippe Lazzarinin chuan a sawi a.
Ram pariat te chuan 7 October 2023 a Hamas tena Israel an beihnaa mi sang chuangin nunna an chan phahna chhanah khan UNRWA staff te pawh inhnamhnawihin an tel a tih hnuah Gaza tanpuina an titawp a ni.
UNRWA te chuan chhuichianna an neih mek thu leh an hnathawk thenkhatte chu an ban tawh thu an sawi a.
Israel chuan tun hma atang tawhin UN branch pakhat UNRWA chu thleibik nei leh Israel hua tiin a lo sawisel tawh thin a ni.
UNRWA hnena fund pe duh tawh lo te zingah Australia, Canada, Finland, Germnay, Italy, the Netherlands, Uk leh US te an tel a ni.
United Nations Relief and Works Agency, UNRWA hi kum 1949 a din kha niin Gaza a UN agency lian ber a ni a. Healthcare, education leh humanitarian aid hrang hrang Gaza a cheng Palestinian te, West Bank, Jordan, Lebanon leh Syria a mi te pe thintu a ni a. Gaza chhungah ringawt hnathawk mi 13,000 vel lai a nei a ni.
Israel in Hamas beihna chhang leta a run hnuah UNRWA-te chuan Gaza a an facility hrang hrangte chu Palestinian mipuite dahkhawm nan a hmang zui a ni.
Lazzarinin chuan, “Staff tlemte te chetlakna avanga fund inpek tihtawp ringawt chu a mak a ni” tiin a sawi a. “Mi tlemte a bik takin indo leh leh helai region a political crisis thlen laia an chetlakna avanga agency pum hnuchhawn ringawt chu a dik lo a ni” tiin a sawi a.
“UNRWA chuan a staff neihte list chu kum tinin host country-te hnenah a thawn ziah a, Agency chuan engmah staff member a neihah complaint a la dawng ngai lo” tiin a sawi bawk.
Lazzarini chuan UN Officice of Internal Oversight Services tena investigation an neih hunah thudik a lang chhuak mai ang tiin a sawi bawk.
Israeli Prime Minister Benjamin Netanyahu adviser chuan karkalta Zirtawpni khan 7 October Hamas attack-ah khan UNRWA hnuaia hlawh la te pawh inhnamhnawih zingah an tel tiin a sawi a.
Mark Regev chuan information an neihah UNRWA school a zirtirtu hnathawk te pawhin Hamas-te chetlaka Israeli 1,3000 chuang tihluma mi 250 an rukbo chu an lawm a ni tiin a sawi bawk a.
Regev chuan Israeli mitang an chhanchhuah zinga pakhat pawhin UNRWA a hnathawk nen dah dun an ni tiin a sawi thu a sawi bawk a.
“Hamas-te thunun union an nei a, tun hun hi UN in UNRWA leh Hamas te inlaichianna a chhuichian hun a ni” tiin a sawi bawk.
Regev thusawi hian nghawng na tak nei nghalin UK chuan UNRWA hnena tanpuina a pek thin a tihtawp lailawk thu a sawi nghal a. “7 October a Hamas tena Israel an beihnaa UNRWA staff-te an tel ve tih hriat hian UK a barakhaih a ni. UK chuan heng puhna te kan chhuichian laiin UNRWA hnena tanpuina kan pekte kan titawp lailawk ang” tiin UK Foreign Office chuan an tarlang zui nghal a ni.
EU pawhin investigation kimchang neih a ni ang a, chumi hnuah thutlukna kan siam ang an ti bawk a. Gaza tanpui nana thawh hlawk ber ber te chu US, Germany leh EU te an ni.
UN Secretary General Antonio Guterres chuan a thil hriat chu rapthlak a tih thu a sawi bawk a. Israeli Foreign Minister Israel Katz chuan indo zawh hnuah Gaza-ah UNRWA te an awm zui loh nan hma a lak tur thu a sawi bawk.
Mahse Palestinian Authority minister for civilian affairs Hussein Al-Sheikh thung chuan ram thenkhatte thutlukna siam chuan political leh humanitarian relief nasa zawkin nghawng chhia a nei ang a ti bawk.
Israeli Foreign Minister Israel Katz chuan UNRWA commissioner-General Philippe Lazzarini chu bang turin a ngen thung a. Katz chuan UNRWA chu Gaza rebuilding duh leh tumna tak tak nei leh remna leh muanna duh agency in thlak rawh se a ti bawk a.
Israel leh UNRWA inlaichinna hi tunhnai mai ni lo hun rei tawh tak ata chhe tawh niin UNRWA chuan Israel in Gaza a beihnaah pawh Gaza mipuite an dahkhawmna Khan Younis-a an hmun chu a fuh tel tiin a lo zualko tawh bawk a.
Israel thung chuan an tih a nih loh thu sawiin an enfiah hnuah UNRWA beitute chu Hamas-te zawk an ni tiin an sawi ve thung.
Gaza indona chhuah hma pawh hian UNRWA chu sum lamah a talbuai sa tawh a. A budget a tlakhniam em avangin a dinhmun a chhe hman hle a, kum 2018-ah phei chuan US president hlui Donald Trump-an sum a pek duh loh avangin an talbuai hman hle a ni.
Mahse, Joe Biden administration chuan kum 2022 khan $340 million tanpuina a pe thung.