US-in Mexican drug cartel hruaitu panga hrek

US-in Mexican drug cartel hruaitu panga hrek
United States chuan Mexican drug cartel hruaitu pangate chu mi thah leh ruihhlo tawlhna an inhnamhnawih avangin a hrek thar tih US Department of the Treasury chuan a puang.
Nilainia hrekna tihchhuah thar hian Cartel de Jalisco Nueva Generacion (CJNG)-a an hruaitute an bitum deuh ber a, he pawl hi Donald Trump-a sorkar chuan US-a fentanyl leh phal loh damdawi dang thawn luhnaa inhnamhnawih lian ber nia a ngaih a ni.
Cartel hian an elpui pawlte tihthaih nan hmeichhiate thlenga bitumin an that thin niin a sawi a. Mi an thah zingah hian Mexican influencer Valeria Marquez-i pawh a tel.
“Rawng taka an chetna hian Mexico-a hmeichhiate an bitum bik dan a lantir chiang hle a. Hmeichhia an thah hian hrem lohvin an chhuak zel a, Mexico-a hmeichhiate nun a tiralti hle a ni,” tiin Treasury Department chuan thu a chhuah.
February khan Trump-a sorkar hian CJNG hi ‘Foreign Terrorist Organization’ leh ‘Specially Designated Global Terrorist’ huangah a lo rin lut tawh.
Cartel hi Nemesio Ruben ‘El Mencho’ Oseguera Cervantes-a kaihhruai niin Nilainia hrekna puan mi panga zingah pawh hian a tel a. US thuneitute chuan man a nih theih nana a chin hrilh thei hnenah $ maktaduai 15 pek an tiam nghe nghe.
Amah nena inhnimhnai tak, cartel commander Ricardo Ruiz Velasco-a pawh hrek zingah hian a tel.
Ruiz-a hi a ngaihzawng, TikTok influencer Marquez-i thahnaa a mawhphurtu bera ngaih a nih thu Treasury Department chuan a sawi.
Kum 23 mi, Marquez-i hi May thla khan Zapopan khawpuia a hna thawhna beauty salon-ah mipa pakhat lutin YikTok-a video live-a a tihchhuah laiin a kap hlum niin Jalisco state prosecutor chuan a sawi.
Hrek zingah hian Julio Alberto Castillo Rodriguez, Gonzalo Mendoza Gaytan leh Audias Flores Silva te an tel bawk niin Treasury Department thuchhuah chuan a tar lang bawk.