US House of Representatives chuan Russia a beihlet nana US in Ukraine hnena tanpuina sum dollar billion tel chu remtihna a pe ta.
Ukaoine hnena tanpuina $61 billion chu hun rei tak chhung tihkhawtlaia a awm tawh hnuah remtih a ni ta a ni. Tunah chuan engtikah nge chung tanpuina pawimawh lutuk te chuan Ukraine a thlen ang tih chu zawhna a ni tawh zawk a.
Ukrainian President Volodymyr Zelensky chuan US tanpuina chu ‘pawimawh chungchuang’ tia sawiin lawmthu a sawinaah Zelesnky chuan, “Democracy leh zalenna chuan khawvelah pawimawhna a nei zel ang a, America in a humhim tlat chhung chuan a hlawhchham ngai lovang” tiin a sawi bawk a.
|anpuina chuan indona tilianin nunna chan tur tam tak a chhanhim dawn a ni, tiin a sawi bawk.
Kremlin thupuangtu Dmitry Peskov thung chuan tanpuina pek chuan ‘United States of America tihausa in, Ukrainians tam zawkin nunna an chanbelh dawn avangin Ukraine a tluchhe tial tial thung ang’ tiin a sawi.
Russian President Vladimir Putin chuan February 2022 khan Ukraine a run thut a, khata tang khan mi sang tam tak a tam ber sipai te chu an thi emaw hliam tuarin emaw an awm tawh a, Ukrainians maktaduai chuang te chuan an chenna an chhuahsan phah tawh bawk a ni.
Ukraine hnena tanpuina pek remtih rual hian US chuan Israel hnenah military support $26.4 billion a pe bawk a, heta tanga 9.1 billion dollar chu Gaza a humanitarian aid atana hman tur a ni.
Asia-Pacific bikah Taiwan ram ang tena ‘communist China an dodal na turin’ tanpuina $8.1 billion a pe tel bawk.
Hei bakah hian House chuan bill pawimawh tak China-based owner TikTok social media platform an hralh ngei ngei emaw US a khap a nih theihna tur emaw pawm fel a ni bawk.
House a vote lakah tanpuina pek remti 311 an awm laiin a remti lo 112 an awm thng a, pawmfel a nih veleh Ukrainian flags te House chhungah an vai hial a ni.
Tihian Senate ah a kal leh ang a, Senate erawhin a pawm nghal tura ngaih niin chumi hnuah President Biden an hming ziah hnanin dan a ni zui tawh dawn a ni.
President Biden chuan House thutlukna chu lawmawm a tih thu sawiin Senate pawh pawmfel zui vat turin a ngen a, ‘tichuan hming ka ziah hnan ang a, rang takin ralthuam leh hmanrua te Ukraine in indona tualzawla a hman tur kan pe thei dawn a ni’ tiin a sawi.
Nato Secretary-general jens Stoltenberg chuan US in tanpuina a pek chu thlawpin European allies te pawhin Ukraine hnenah tanpuina billion tel an pek zui ve nghal tur thu a sawi bawk a.
“Ukraine hian Russia lakah tanpuina pek a phu a ni” tiin EU chief Ursula von der Leyen leh Charles Michel te chuan thuchhuah intawm an siamah an tarlang bawk.
Ukraine foreign affairs committee hotu lu ber Oleksandr Merezhko chuan US House thutlukna siam chu ‘thutlukna chhinchhiahtlak’ tia sawiin ‘kan civilian leh sipai nunna tam tak a chhanhim dawn a ni’ tiin a sawi a.
“Chakna min pe a, huaisenna leh beichhunzawm zel tura tumruhna min pe a, tunah chuan frontline dinhmun a inthlak zui tawh ang” tiin a sawi.
Ukraine, Western weapon a innghat bur chuan Russian sipai te dan nan tanpuina a mamawh ngawih ngawih a, tun hnaiah Russia sipai te chuan ram an la duai duai a ni.
Ukraine sipai te chuan hmanrua an tlachham tawh hle a, frontline 1,200km a seiah artillery shell te chu a tahtawlin an sem tawp mai tawh a ni.
US House in remtihna a pek hma hian Zelensky leh CIA head William Burns te chuan America puihna a hmu lo a nih chuan Ukraine chu a tlawm ngei ngei dawn an lo ti lawk tawh bawk a.
US tanpuina avang hian Ukraine chuan chakna a chang ngei ang tihna a ni lo va, mahse, hun rei zawk tang thei turin theihna a nei a, chutihlai chuan inremna a awm theih nan hmalak zel a ni dawn bawk a ni.
House chuan thla eng emawti chhung chu Ukraine tanpuina tur hi an tifel lawk thei lo va, Republicans thenkhatte chuan US-Mexico border chingfel thei si lova ram pawna pawisa pek a rem lo tizawnga tan la in Republican te chuan US-Mexico border chungchang kar pah nan an hmang ve tlat a ni.
US in Ukraine $61 bn pek remti
Get real time updates directly on you device, subscribe now.
Prev Post
Next Post