US-in Ukraine pui zui zel

Ukraine chuan tun hnaiah US-in a ruka a pek long-range ballistic missile chu amah runtu Russian sipaite lakah a hmang tih American officials te chuan an sawi chiang ta.
Heng ralthuamte hi March thlaa US President Joe Biden an $300 million aid package a peka tel niin tun thlaah Ukraine a thleng ta a ni.
US media-te chuan long-range missile te chu Crimea-a Russian target beih nan tum khat hman a ni tawh tiin an sawi a. Tunah Biden chuan Ukraine tanpui nan $ 61 billion package ah hming a ziah hnan leh ta bawk.
US hian a hmain Ukraine hnenah Army tactical Missile Systems (ATACMS) mid-range version a lope tawh a, mahse, chu aia ralthuam tha zawk pek erawh a hreh hle thung.
Mahse, Biden chuan a rukin long-range system missile te 300km thlenga kap pha chu February thla khan pek a lo remti tawh a ni.
“United States chuan Ukraine hnenah long-range ATACMS chu president thupek angin a pe tawh” tiin state department thupuangtu Vedant Patel chuan a sawi.
US chuan heng long-range missile te hi a pek tirhah a sawi duh lova tua a sawi chauhna chhan chu operational security thilah Ukraine in a ngenna avang tia sawi a ni.
Engzah nge heng ralthuamte hi Ukraine hnenah pek a nih sawi lan a ni lo va, mahse, US National Security Advisor Jake Sullivan chuan Washington chuan tam zawk pek belh a tum tiin a sawi a.
“Danglamna an siam ang a. Mahse, tun ang dinhmunah hi chuan engmah silver bullet a awm thei tak tak lo” a ti thung.
Missile hmun hla zawk kap thei te chu kar kalta khan Ukraine chuan a tum khat nan Crimea a Russian airfield beih nan a hmang tiin Reuters news agency te chuan an tarlang bawk a.
Missile an dawn thar te chu Thawhlehni khan Russia-in a awp mek Berdyansk port city-a Russian sipaite beih nan hman a ni tiin New York Times chuan a tarlang bawk.
Tun hnaiah Kyiv chuan Khawthlang ram te chu ralthuama puihna nasa zawkin a ngen a, ralthuam a neih tlem tawh avangin Russia chuan hma a sawn zel phah tiin a sawi a.
US pawhin thla eng emaw zah chhung Congress ah a tan khawtlai hnuah Ukraine tanpuina tur remtihna neihfel a ni tawh bawk a. “America him zawkin a siam dawn a, khawvel him zawkin a siam ang” tiin Biden chuan Ukraine puihna tur bill a hming ziah hnannaah a sawi a ni.
Ukrainian President Volodymyr Zelensky chuan, “Tunah chuan kum chanve zet inhnial nan leh rinhlelhna avanga kan hloh tawh te neilet turin hma kan la thei ta” tiin US Congress in tanpuina pek an remtih hnuah a sawi a.
“Russian tena khang hun chhung zawnga an hmalak tawhna te Putin an ruahmanna a siam mek te chu kan tichhe dawn a ni” tiin a sawi.
Ukrainian forces te chuan tun hnaiah ammunition leh air defence system an tlachham hle a, chuvang chuan Avdiivka khawpui pawh Russia lakah an hloh phah bawk.
Russia chuan 24 February 2022 khan Ukraine a run hnuah mi sang tam tak a tam ber sipai ten nunna chan tawhin mi tam takin hliam an tuar a, mi tam takin an chenna in chhuahsanin an raltlan mek bawk.