US leilunga goal khung mar rei Messi

US leilunga goal khung mar rei Messi
Argentine World Cup winner Lionel Messi chuan a club thar Inter Miami tan Thawhlehni zanah goal khung lehin Philadelphia Union laka 4-1 hnehna nuamsa nen Leagues Cup final an lut a, Inrinni final-ah Nashville SC an su leh ang.
Thawhlehnia Miami goal hnihna a thawh leh nen PSG forward hlui hian Major League Soccer club tana a game hmasa parukah goal kua tehreng tilut tling tawhin, training laia a kheimit a tihnat chuan semi-final match lamah harsatna a siamsak zui lo hlauh a ni.
He match-a Inter goal thum dang chu Josef Martinez, Jordi Alba leh David Ruiz-te khung niin, mualneitu team goal neihchhun kha Alejandro Bedoya tihluh a ni thung.
Leagues Cup final an luh avangin Miami hi season thara Concacaf Champions Cup regional tournament khel turin an tling nghal a; hei hi Fifa lamin kum 2025-a Club World Cup huang a zauh tur hmun panna kawng pakhat a ni nghal ang.
Miami boss Gerardo Martino chuan an tum ber chu season thara international khelh phak a nih thu sawi chungin an hlawhtling ta tih a tarlang tel a, tunah chuan an tournament hmachhawn laia champion fel law law lamah an insawrbing leh nghal niin a sawi a, chumi tur chuan an phurin, an inringtawk hle tih a sawi.
Tarlan tawh thin angin, Thawhlehni result kha July thla atanga Messi an chhawr hnua a zawna Miami vawiruk chakna ni tawhin, kum 36 mi tan tan Inrinni inkhel hi a career-a final match tum 42 a khelhna tur a ni tawh.
Leagues Cup hi World Cup-style knockout tournament niin, Mexico leh US top flight Major League Soccer team-te inelna a ni tih tarlan tawh thin a ni a; final match hi semi-final pakhat zawka Monterrey laka 2-0 hnehna chang Nashville khelmuala khelh tur a ni.
Subaru Park-a semi-final lehlamah Messi magic kan hmu chhunzawm leh kha a ni a; last four paltlang zo ta lo Philadelphia Union kha nikuma MLS Cup final khel pha niin, an khelmuala record nei tha tak an nih bawk avangin Argentine an chhawr hnua Inter Miami chak tluang lai pawh tawp thut thei tura ngaihna a piang hman a, mahse, Argentinean striker hoa an chetchhuah tawha fiahna lian ber chu mittlung takin an paltlang leh ta a ni.
Mikhual Miami lamin tha rang atin bul an tan leh a, goal pawh hma takah hlawhchhuak lehin, tan atanga minute thumna lekah Josef Martinez chuan Serhiy Kryvtsov siamsak atangin goal hmahruai a khung.
Minute 20 an khel tling chiah tihah Inter Miami captain thar hun a inherchhuak ve leh a, mak angreng taka midfield-a ven loh Messi hian Martinez-a ball pek a tlanluhpui hnuah hla deuh tak atangin goal lamah a thawn phei a, Union goalkeeper Andre Blake a che muang lam hret a ni.
Chawlhlawk hma lawkin Barcelona lama Messi team-mate ni thin Jordi Alba a inlar ve leh a, Union laka sithum faia mikhual hmahruaina goal thawhin, half time laia inthlakna pindan pana mualneitu team player-te kal lai chu home fans lamin nasa takin an boo khum nghe nghe.
Second half laihawl minute 73-ah Philadelphia hian zangnadawmna goal hlawhchhuak ve bauhin, Alejandro Bedoya chuan mualneitu team tantute hrilhhai lutuk tur dalah an goal neihchhun ni zui ta a thawh a, mahse, hun pangngai tawp hma minute ruk chiah awm tawhah David Ruiz chuan Miami goal phai chhungkhat lehin, ti hian, an match khelh hnuhnung vawirukah David Beckham-a club hian goal 21 zet an khawl tling ta!
Inrinni Leagues Cup final hi an club chanchina Miami-in final an khelh vawikhatna tur niin, nakuma an khelh tur CONCACAF Champions League pawh hi an club history-a an khelh vawikhatna tur bawk a ni.