US President Joe Biden an phuba lak tur ti

US President Joe Biden chuan Pathianni a Jordan a drone attack hmanga American sipai pathum in nunna an chanphahna chu chhan let turin thutlukna a siam thu a sawi a. Drone hmanga beihna kalpuitute hi Iran thlawp militia group te nia ngaih niin mahse Biden chuan Middle East a indona chu tihpunlun a duh lo tiin a sawi thung.
US officials te chuan Iran thlawp militant group tam tak awmah American sipai te beitu chu an chhuichiang mek a. October 7, 2023 a Hamas tena Israel an beih hnu khan helai region ah US forces te beihna a nasa hle a.
Biden hian US sipai nunna chan te ruang lo hmuah tumin reporter tena chhanlet a tum em tia an zawhna chu an tum thu sawiin mahse Middle East region a buaina tihpunlun an duh lo tiin a sawi a.
“Middle East ah indona zauzawk a awm tulin kan hre lo” tiin Biden chuan White House ah a sawi a, “chu chu kan tum pawh a ni lo” a ti bawk.
Biden hian thlurbing bik neiin chet an la dawn nge engtiangin nge phuba lakna an kalpui dawn a sawi chiang lo va. US official te chuan Jordan a beihna an tawh chhan let dan tur an la ngaihtuah mek tiin The Associated Press chuan a tarlang.
National Security Council spokesman John Kirby chuan US chhanlet dan tur a enlawk hmasak dawn loh thu sawiin mahse a tahtawlin kalpui a ni ang a ti.
“|um khata tihnghek lam ni lovin, awmze neiin a tahtawlin kan kalpui ang a, chetlakna tam tak hun rei tak chhung kan nei ang” tiin a sawi.
Hetihlai hian Iranian thlawp Iraqi militia Kataib Hezbollah, US official tena an rinhlelh zinga tel chuan thuchhuah an siamah Iraqi sorkar mualpho lutuk tur ven nan military leh security operation an kalpui chu an chawl rih dawn tiin an sawi.
Iraqi militia tena US forces te tun hnai thla li vel lai an beih tawh chuan Iraqi Prime Minister Mohammed Shia al-Sudani chu dinhmun remlo takah a dah a. Sudani hi Iranian-allied faction tena an thlawp niin chutihrual chuan Washington malsawmna dawn duh tho niin Iraq a US hmun beihna te chu a dem thu a sawi a. Iraqi leh US official te chuan karkalta Inrinni atang khan US sipai awm tihtlem dan turah inbiakna an nei tan bawk.
Nikum October 18 atang khan US military installation tum 166 lawih beihin a awm tawh a. Iraq ah tum 67, Syria ah tum 98 leh Jordan ah tum khat beih a ni tiin US military official te chuan an sawi a. Thawhleh khan Al-Asad Air Base, Western Iraq chu rocket hmanga kah a ni leh bawk a, mahse, nunna chan leh hliam an awm lo. Jordan a US hmun beihnaa US sipai pathum thihna chu Israel leh Hamas te indo hnua US in sipai a chan hmasak ber a ni bawk.