US visa dan tharin 2026 FIFA World Cup nghawng buai ring lo

US visa dan tharin 2026 FIFA World Cup nghawng buai ring lo
President thar Donald Trump an neih hnuah America chuan anmahni invulhna leh intihropuina, inhungbikna leh intihchakna, ramdangmi ngaihtheihlohna leh an ram chhunga dan loa lutrute danbeh leh thawnhaw bakah an rama lut turte laka fimkhurna nasatakin an kalpui mek a, an ram luh theihna visa diltute pawhin hun rei zawk an nghah a ngai ta a, hei hian nakkuma World Cup an thlen hunah pawh football fans tan harsatna a thlen thei mai ang em tih hlauhthawnna a piang a, mahse, France football great Marcel Desailly chuan he rin dan hi a pawm loh thu a sawichhuak.
Tarlan tawh thin angin, team 48 inelna tur 2026 World Cup hi nakkum June ni 11 atanga July ni 19 chhung hian ram inthenawm pathum US, Canada leh Mexico-te’n an inthlentawm dawn a; United States-ah match 78 khelh a ni ang a, Canada leh Mexico ramah game 13 ve ve an khel bawk ang.
1998 FIFA World Cup leh 2000 Euro-a France an champion theihna kawnga player thawhhlawk zinga mi Desailly kha chuan tunlaia Trump-a chawhchhuah sumdawnna lama indona lian tak thleng mek (tariff war) leh visa khirhkhan ta khuan nakkum World Cup-ah nghawng a neih a ring lo a, sport chu engkim chunga leng nih thu leh tunhma lam pawhin visa issue tih mai mai aia harsatna lian tham zawk awm thin pawhin Fifa tournament lian ber hi a tibuai tak tak zo lo niin a sawi.
He thu hi April ni 21-a Madrid khawpuia Laureus World Sports Awards sem inkhawm huaihawt tur behchhan online hmanga inkawmhona (virtual interaction) kaltlanga a sawi a ni.
Laureus World Sports Academy member ni bawk Desailly chuan, “Qatar (2022)-te kha ngaihtuah ta che u! Toiurnament tan hmaa sawiselna a nasatziate kha. Mite chuan tournament hlawhtling lo zet ni turin an sawi a, mahse, tournament tuihnai mangkhengah a chhuak leh ta tho a; himna chungchang, a huaihawttu leh a boruak hrim hrim, engkim mai kha top level vek a ni,” a ti!
Kum 2004 hnu lama ram tana inkhel leh ta lo mihang kai rual ve tak Desailly hi tunah kum 56 mi ni ve tawhin, tunhnaia a thusawiah hian 1998 World Cup trophy an lak khan a nun a tidanglam hlawk tih a sawi a, an ram pawh a tipumkhat tih a tarlang tel.
Desailly chuan, “Engkim hi a ni mai. Kha hnehna khan ka nun hi a thlakthleng hlawk a; kan han champion chiah kha chu France pawh a inpumkhat nghal a, Black France kan awm loh ang bawkin White France pawh an awm chuang lo – France a ni tawp mai. Mipui kha kawtthlerah an tlanchhuak vek a, an inkuah a, an tap a, champion an lawmho a ni. Vawikhat na reng reng chu football khan inpumkhat tura a theihna a phochhuak chiang hle a ni,” a ti.
Club lamah pawh French side Marseille leh Italian club AC Milan chu UEFA Champions League title a lakpui tawh bawk.
Kumina Champions League trophy hawn tura a rin an zawhnaah Desailly chuan, “Bayern Munich hian min surprise thei tur hmanrua hi englai pawhin an kawl phawt mai a, mahse, kumin hi chuan Barcelona hi an khawng zawk deuhin a lang a, an DNA ni kumkhua – an naupan seng sawngna te, anmahnia theihna leh talent bet tlat te, an passing dik tak leh mahni inrinna nghet tak an neihte kha an lantir kal leh mek tlat a ni,” tiin Catalan club chu a sawi hmangah hian champion tura buk rit ber niin a lang!