Valentine’s Day pualin a thlawnin thisen unit 1031
Valentine’s Day puala a thlawna thisen pek runpui neihah Mizoram pumah unit 1031 pek a ni.
Association for Voluntary Blood Donation (AVBD), Mizoram State AIDS Control Society (MSACS), Civil Hospital Aizawl Blood Center leh Music Domain Mizoram (MDM) tangho buatsaih thisen pek runpui, ‘Valentine’s Day Blood Donation Camp’ hi Nilaini khan district hrang hrangah neih a ni.
Aizawla hmanpuitu Youth Services minister Lalnghinglova Hmar chuan midang tana rawngbawlna leh malsawmna a ni tih hriaa phut let nei loa thisen pe ngam tam tak Valentine’s Day pual thisen pek huaihawta an tel chu ropui a tih thu a sawi a. Thisen pek chu changkanna leh hmasawnna intihhmuh chi tak a ni, tiin, thisen pe theite chu hun remchang an neih bawhpelh loa pek zel tum turin a fuih.
Valentine’s Day pual thisen pek runpui hi kum 2010 khan TV presenter thin Chuauzikpuii’n thiantha sawmin Civil Hospital Aizawl Blood Bank-ah buatsaihin bul a tan a. Thupui atan “Show Love, Give Blood” tih hman niin, thalai tam takin an hmangaihte puala thisen pein midang tan an pe a ni. Kum 2011 atangin AVBD Gen. Hqrs nen tangdunin buatsaih zui a ni ta a, kum 2013 atangin district pali -Aizawl, Lunglei, Serchhip, Lawngtlai ah he programme hi neih a ni. Kum 2014 ah khatih laia district zawng zawng (8) ah AVBD leh Blood Bank tangdunin an buatsaih a, kum 2020, 2022 leh 2023 ah phei chuan Blood Bank awmna zawng zawngah hman a lo ni ta a ni.
A tan tirh, 2010 khan unit 146 pea bul tan niin, nikum khan unit 1113 pek a ni a, kum 2010-2023 chhunga Valentine’s Day programme bika thisen pek tawh zat hi unit 9853 a ni. Kuminah hian hmun 9-ah thisen pek runpui hi neih a ni.
AVBD Mizoram chuan thalaite chu damlo thisen mamawhte tana thisen pek uar chhunzawm zel tur leh kum khat chhungin tum 2/3 tal thisen pek theuh tum turin a sawm a. Thisen pek chu mahni hriselna inchikna, free medical check-up a ni pah bawk a ni, tiin, thisen pe ngam ngei nupui pasal atana thlan nachang hre thar turin thalaite a chah.
Pekna hmun Pek zat
Civil Hospital Aizawl 274
Synod Hospital 156
ZMC 127
Lunglei Civil Hospital 138
Champhai Hospital 113
Kolasib Hospital 102
Serchhip Hospital 19
Siaha Hospital 52
Lawngtlai Hospital 50
Total 1031