Vantlang Viltu Mob App

Serchhip bawrhsap pisa buatsaih “Vantlang Viltu Mobile Application” chu Nilaini khan chief minister Lalduhoma’n a tlangzarh a.
He application hi, dan phal loha tuichhe paih, kawngpui tihhnawk, bawlhhlawh paih leh halral, ruihhlo rui leh hralh, kangmei chhuak, vanduaina, transformer chhia leh electric kaihhnawih harsatna, traffic rules bawhchhia, tui connection lama harsatna, ni tin nuna harsatna an tawhte mipuiin sawrkar an hrilh zung zung theihna tura duan a ni.
Science leh Technology hmasawnna hian khawvel huapin mihringte khawsak phung a her danglam chak hle a, hma pawh kan sawn chak phah. Hmun kilkhawr tak Mizoramah pawh, science leh technology-in a hrinchhuah hmasawnna leh changkanna kan chhawr tangkai ta hle a, hmasawnna pawh hmuh theihin a kal ruak ruak reng a ni ber tawh a; hnam nunphung (culture&tradition) te pawh a sawi danglam mek bawk.
Tunhmaa public information atana kan leklam ber pakhat chu aurinna kan tih mai PA System (Public Address System) kha a ni a. Mipui hriat tur pawimawh zawng zawng kha aurinna hmanga puanzar thin a nih avangin ‘noise pollution’ a nasa em em thin a. Veng tin mai khan zan lamah leh zing lamah aurinna hmangin thu an han puang chuah chuah mai thin kha chu, Veng thenkhat tan chuan, ‘a eng ber nge mahni Veng chhung thu puan’ tih pawh kha hriat a har thin hle a ni.
Tunah chuan, PA system hman tulna chin chu la awm tho mah se, tunhma anga zing leh tlaia aurinna ri chuah chuah thin kha a nep ta hle a. Tunah chuan zan lamah emaw zing lamah emaw, aurinna ri ngaichang tawh lovin, mobile phone kan bih tawh mai a. Vawiinah buhfai a lak theih a nih hi, vawiin tui an sem dawn, gas an sem dawn, chumi khami chu a boral, damdawi inah a awm etc. tih kan hre zung zung thei tawh a; kan information system chu a hma aia changkang leh rang zawkin kan thlak ta. Hengte hi tunlai hmasawnna chhawr tangkai thiamna zel a ni a. Nakinah chuan hei aia changkang leh rang zawk leh rintlak zawk system hi kan la hmuchhuak zelin a rinawm.
Tunlai hmasawnna chhawr tangkaina tur dap chhuah thiam leh chhawr tangkai thiam hi a pawimawh hle reng a. Serchhip bawrhsap pisa-in hetiang thil tangkai tak an ngaihtuah chhuak thiam hi a lawmawm hle a; chief minister-in a sawi ang hian, district dangte pawhin hetiang thil hi buatsaih vek thei se, kawng tam takah hma kan sawn chak phah ngei a rinawm.