Vawiin atangin Pro Fight entry form pechhuak dawn

Tata SK 612 LPS Pro Fight-a tel tur tan vawiin, Thawhlehni chawhma dar 10 atangin LPS Office, Zarkawt, Aizawlah entry form pekchhuah a ni dawn a, Mizoram chhung leh pawn atangin a duh apiang tel theih a ni.
Form pakhat cheng sawm zela lakchhuah tur a ni a; kum 17 chin chung lam tan weight hrang panga – fly (kg 48 atanga 52), bantam (kg 52 atanga 56), light (kg 56 atanga 61), welter (kg 61 atanga 67) leh middle (kg 67 atanga 74) inkarah tel theih a ni ang.
Mizo boxer-te tana buatsaih a nih rualin hnam dang, Mizoram chhung leh pawn atang pawhin a duh apiang tel theih a ni a, chutih rualin senso anmahnia an intum vek a ngai thung dawn a ni.
October ni 2 khian LPS Arena, Falkland Veng, Aizawlah Tata SK 612 Pro Fight khelh tan a ni dawn a, November tir lamah weight hrang pangaa champion tifelin, Title Fight huaihawt tura ruahman a ni.
Kumin Pro Fight hmawrbawknaah hian tunhma lama Pro Fight weight hrang pahniha champion lo ni tawh HC Johnkenty Van-hlimpuia’n profe-ssional boxing a luh-chilhna tur inhnek buatsaih tum a ni a; vawinga Pro Fight champion ni tawh NT Lalbiakkima leh Mizo professional boxing-a hriat hlawh zinga mi F. Zoramchhanate inhnek zehtel tum a ni bawk.
Nikum khan weight hrang panga – fly, bantam, feather, light leh welter-ah champion zawn a ni a, boxer 211 an tel a, champion laite hi kumina an tel leh dawn a ni chuan seed pek an ni ang.