Vice president 15-na atan Radhakrishnan la lut

Vice president 15-na atan Radhakrishnan la lut
Chandrapuram Ponnusamy Radhakrishnan chu Zirtawpni khan India vice president 15-na atan Rashtrapati Bhawan, New Delhi-ah lak luh a ni ta.
Radhakrishnan-a hi President Droupadi Murmu-i’n rinawmna thu tiamtirin a la lut a, inkhawmah hian sorkar mi pawimawh thahnem tak an tel.
Prime Minister Narendra Modi, vice president hlui Jagdeep Dhankhar leh Venkaiah Naidu, president hlui Ram Nath Kovind, Home Minister Amit Shah, Defence Minister Rajnath Singh, Maharashtra Deputy Chief Minister Eknath Shinde, Andhra Pradesh Chief Minister N. Chandrababu Naidu, Union Road Transport & Highways Minister Nitin Gadkari, Uttarakhand Chief Minister Pushkar Singh Dhami leh mi pawimawh dangte an tel.
Rorel lai tangrual, NDA-in an vawrh chhuah, Radhakrishnan-a hian Thawhlehnia vice president thar tur thlannaah khan eptu tangrualten an dintir, Supreme Court judge hlui, B. Sudershan Reddy chu vote 452-300-in a hneh a ni.
Inthlan result puan a nih hnuah Rajya Sabha Secretary General leh Returning Officer PC Mody chuan MP 781 zinga 767-in vote an thlak a, 98.2% a nih thu a sawi a. Vote tla zinga 752 chu vote nung niin 15 a thi a, hei vang hian tling tura vote hmuh ngai zat pawh 377-ah a tlahniam nghal a ni.
NDA hian thlawptu MP 427 an neih sa bakah YSRCP atangin Radhakrishnan-a hi MP 11-in an thlawp bawk a. NDA candidate hian chhut lawk aiin vote 14-in a hmu tam a, eptu lamah amah vote an awm ve em ni tih zawhna a siam phah.
Result-a chhuah hnuah Prime Minister Narendra Modi-a chuan Radhakrishnan-a hi lawmpuina hlanin vice president thlan thar chuan India-a danpui hmanga rorelna chu a tihhlut sawt leh parliament rorel inkhawmah pawh a tha zawnga nghawng a neih a beisei thu a sawi.
Tar lan tawh thin angin July 21 khan Dhankhar-a chuan kum hnih chuang hret hun a la nei tihin vice president a nihna atangin bânna a thehlut a, August 10, 2027 thleng hun la nei a ni a. A bân chhanah hian a hrisel lohna chhuanlam mah se sorkar laipui leh amah inkarah eng emaw a awm nia sawi a ni a, hei hi a chhan ni zawka ngaih a ni.
Vice president hi Rajya Sabha leh Lok Sabha-a member-te chauhvin an thlan theih a ni.
Ram danpui Article 68 Clause 2-ah chuan vice president hi a tanglai an thih emaw, paih thlak an ni emaw, chhan dang avanga an nihna an chelh zui theih loh chauh ‘a hma thei ang berah’ a thar thlan tur a ni a. Thlan thar chuan pisa a luah ni atangin ‘kum nga chhung hun (term) a neih a thleng hun a nei dawn a ni’ tih tar lan a ni bawk.