Vladimir Putin-a’n UAE leh Saudi Arabia tlawh

Russian President Vladimir Putin chuan United Arab Emirates (UAE) leh Saudi Arabia te tlawhin a zin.
A zinnaah hian Gaza leh Ukraine chungchang bakah oil production chungchangte UAE president nen an sawi dun a ni.
UAE hian tunah COP28 UN climate summit a thleng mek bawk a.
Putin hian International Criminal Court in amah manna tur thuchhuah an siam hnuah March thla atang khan Russia a chhuahsan ngai mang tawh lo a ni.
ICC te chuan Putin chu dan kalha Ukrainian naupangte Russia-a thawnlutah puhin chu chu war crime a ni a, mahse, UAE leh Saudi Arabia te hi ICC court huam chhungah an tel ve lo.
Russian leader hian tun hnaia international summits August thlaa South Africa-a Brics te leh September thlaa India-a G20-ah te pawh a lo tel tawh lo a ni. Russia hian Khawthlang ram tena an kawmserhna lakah ram hrang hrang te biak that tumin hma a la mek a ni.
UAE-ah hian President Sheikh Mohamed bin Zayed Al Nahyan chuan lo hmuakin Putin chuan ‘kan inkawmngeihna tun hma zawng aiin a sang zawk’ tiin a hrilh a ni.
UAE-ah hian trade leh oil chungchang sawi a ni ang a, Kremlin thuchhuah siam chuan UAE chu ‘Arab world a Russia economic partner lian ber’ tiin a sawi.
Putin hian UAE atangin Saudi Arabia pan lehin Crown Prince Mohammed bin Salman nen an inkawm zui leh bawk a. “Kan inlaichinna tha zel hi engmahin a dal thei lo,” tia sawiin, regional events awmah chanchin inhrilh tawn zel a ngai a ti bawk.
Russian news agency Tass chuan Putin leh crown prince te hian Opec+ cooperation chungchang an sawi dun a ti bawk.