Vladimir Putin seltu langsar ber Alexei Navalny thi thut

Anti-corruption campaigner Alexei Navalny, Russia president Vladimir Putin dodaltu lian bera ngaih chu a tanna Artic jail-ah a thi tiin Russia thuneitute chuan an puang chiang. Navalny team te chuan anti-corruption campaigner chu President Vladimir Putin thupek anga thah ni ngeiah an ngai thung a.
Khawthlang ram te pawhin kum 47-a upa Navalny thihnaah chuan Russian thuneitute chu mawhphurtu tiin G7 group te pawhin Russia chu rang taka sawifiahna siam turin an ti zui nghal bawk.
Navalny chu Putin regime sawiseltu langsar ber niin politics thila thubuai a neihah thiamloh chantir niin Moscow atanga 1,900 km laia hla Kharp a ’Polar Wolf’ penal colony-ah kum sawm thum chhung lung in tang tura tang mek a ni.
Zirtawpni kalta khan Navalny nu Lyudmila Navalny chu prison service ten a fapa thih thu an hrilh a, a walk laiin nikhaw hre lova tluin a thi zui tiin an hrilh a ni.
Inrinni-ah a nu chu Navalny tanna hmunah kalin mahse a ruang chu prison complex bula Salekhard-ah dah a nih thu an lo hrilh a, Salekhard a pan zui leh a, mithi ruang dahna chu a lo inkhar bawk si a ni.
Prison official te chuan a tira post-mortem an tih chu a kimchang tawh lova chuvangin an ti nawn dawn tiin an lo hrilh bawk. Navalny team te chuan a ruang chu Russian thuneituten an sulhnu nuai mam nan an la kawl zui tiin an sawi thung.
Tu nge Navalny
Kum 1976 khan Moscow khawthlang lam 100km vela hlaa Obninsk khuaah piangin a seilian a, kum 1998 khan Moscow’s Peoples’ Friendship University of Russia-ah law a graduate a ni.
A hnu kum sawm velah Russian politics ah langsar tan chauh thungin anti-corruption campaigner a nihna chu a lar phahna a ni a. A blog hmangin Russia-a state-controlled company a eirukna nasa tak te chu a pholang thin a ni.
‘A tactic pakhat chu major oil company, banks leh ministries-ah te shareholder ni phawtin chutah state finance a fel lo laite chu zawhna khirh tak tak te a zawt ta thin a ni.
A message pek chhuah leh kalpui tlat chu simple tak niin chu chu Putin party chu ‘bum hmang leh rukru’ a khat tiin a sawi a. Putin chu Kremlin a thuneihna sawrbinga ‘feudal state’ hmanga ‘Russia thisen hip’ ah puh bawkin chu patronage system Putin an a kalpui chu tsarist Russia nen thuhmun reng a ti bawk.
Anti-Corruption Foundation (FBK) dinin social media tangkai taka hmangin hma a la a, kum 2011 khan President Putin laka lungawilohna street protest turu ber a huaihawt hial a ni.
Kum 2017 khan inthlanah a chuh phalsak a ni lo va, khatih lai khan President Putin khing thei awm chhuna ngaih a ni a. Thah tuma beih fo niin a dam khawchhuak ziah thung.
Tura hrai a nih hmasak ber chu kum 43 mi nia lung in a tan lai niin damdawi inah kalpui a ni nghal a, chuta doctor te chuan an enkawl thatloh hle thu a hnuah a sawi zui a. Mahse, thah tumna chu a paltlang thei hlauh a ni.
August 2020 khan thah tuma beih leh niin chu chu khawvelin a ngaihven leh a hriatna tak tak a ni ta a ni. Saiberia chung zawna an awm laiin a tlu a, Omsk hospital panpui chuk chuk niin German-a inbun charity te chuan Russian official te chu Berlin a enkawl tura phalsak turin an ngen hlawhtling a.
German-a enkawl a nih hnuah German sorkar chuan test hrang hrang a tih hnuah Navalny chu chemical nerve warfare Novichok hmanga tihhlum tum a ni, an ti ta a ni, hei hi Kremlin chuan a hnial fithla thung.
EU chuan hei vang hian Russian official paruk leh Russian chemical weapons research centre chu a hrek nghe nghe a ni. Novichok hi March 2018-a Russian spy hlui Sergei Skripal leh a fanu Yulia te Salisbury, England a an hraina tur tho kha a ni a, mahse, chhanchhuahin an awm a ni.
A dam that hnuah Navalny chuan 17 January 2021 khan Moscow a let leh a, lo man nghal niin man a ni dawn tih hre reng chunga let leh ngat a ni. Khata tang khan zalen ta miah lovin a awm zui a. Amah thlawptuten lungawilohna an lantir te pawh Russian thuneitute chuan an hmet dai bawk.
Russia sorkar chuan Navalny a hremna chu ti na tial tialin March 2022 khan a lung in tan tur chu kum kuain a pawtsei a, a tanna hmun atangin Moscow atanga 250km a hla Melekhovo ah sawn a ni.
June 2022 khan lung inah chuan a awm tawh lo tih amah zuitute chuan an sawi hnuah Federal prison thuneitute chuan lung in khauh taka sawi Ik-6 prison Moscow atanga 249 km a hlaah sawna nih thu an sawi chhuak chauh a, hetah hian tlawh pawh theih loha dah nia sawi a ni.
August 2023 khan a thubuai hnuhnung berah thiam loh chantir leh niin kum 19 lung in tang tura tih leh niin hei vang hian Russia a criminal hlauhawm ber ber te dah khawmna maximum security penal colony-ah dah a ni leh ta a ni.
Navalny laka hremna na thei ang ber an kalpui nachhan ber chu Putin regime chuan Navalny campaign chuan thlawptu a ngah tial tial an tih vang a ni tiin Societ leader hlui Nikita Krushchev tunu Prof Nina Krushcheva chuan a sawi.
“Putin hian Navalny hming a lam ri ngai lo, Kremlin-in a hming a lam ri ngai lo hrim hrim. Navalny hi Putin personal power tana hlauhawm a ni a, Putin mimal tan pawh hlauhawm a ni. Putin hian a hmelmate a dim ngai lo,” tiin a sawi.
Lung in a tang chungin Navalny chu Ukraine indona duh lotu langsar ber a la ni reng bawk a. May 2022-a court hmaa inlan tumin Putin chu indona awmze nei lo leh mawl thlak lutuk kalpuiah puhin September thla khan Washington Post tana article a ziahah Russian elite te chu ‘Ukraine thisen atchilh’ tiin a ziak bawk.
Navalny foundation chuan Russia sorkarin Ukraine indonaa tel tur sipai 300,000 a tirchhuak chu an duh loh thu an sawi lang reng bawk a, mipuite chu ‘partisan underground’ movement kalpui turin an tur hial a ni.
Navalny chuan khawthlang ram tena Russia siam that an duha an tih theih that ber chu ‘dirty money’ crackdown a ni tiin a lo sawi tawh bawk a. “Eirukna leh dik lo taka thil titen an ram luh phal lovin visa pe duh hauh lo se la,” tiin a sawi.
Tun thlengin eng vanga Navalny chu thi nge a nih hriat chian theih a la ni lo va. A nupui Yulia leh a fate pahnih a kalsan a ni.
A thih thu hrilh a nih hnuah a nupui Yulia chuan, “He chanchin duhawm lo hi rin tur nge rin loh tur ka hre lo,” tia sawiin, “In vaiin in hrefiah vek a – Putin leh Putin sorkar hi kan ring thei lo. Dawt an sawi reng,” tiin a sawi a.
“A dik a nih chuan Putin leh a thuihruai tin te, Putin thiante leh a sorkar hi kan ram, kan chuhngkua leh ka pasal laka an thiltih danah thiamloh chantir nise ka duh a ni” tiin a sawi.