Vocational Training Centre kalpuina tur fund dil thar

Mizoram tlawha lo zin Union minister of state for Tribal Affairs Renuka Singh Saruta hnenah state Social Welfare & Tribal Affairs minister Er Lalrinawma chuan Vocational Training Centre kalpui zui zelna tur fund mamawh thu a thlen.
Union MoS hian Lungleiah zan riakin hun a hmang a. Thawhlehni khan Delhi lam pan lehin Lengpui Airport VIP lounge-ah Er Lalrinawma hian kawmin, Ministry of Tribal Affairs hnuaia hmalakna kal mek an sawi dun bakah Mizoram mamawh a sawipui nghal.
Vocational Training Centre (VTC) 5 kalpui mek chu mipuiin an chhawr tangkai tih state minister hian a sawi a. Heng VTC hi tunhnaiah a kalpuina tur sum a chatlak tih sawiin, tha taka kalpui chhunzawm zel a nih theihna’n Ministry of Tribal Affairs atanga fund a lo kal chhunzawm zel an mamawh tih Union MoS hnenah hian a sawi.
Kelsiha sak mek Ropuiliani Freedom Fighter’s Museum chungchang pawh an sawidun a. Museum sak pumna atana mamawh zat chu ministry-ah an thlen tawh thu sawiin, fund dil belh hi phalsak thuai an nih theihna’n hma la turin a ngen. Mizorama tribal-te tihhmasawnna atana zirna sikul tha bik – Eklavya Model Residential School (EMRS) 6 a awm thu te, 5 sak mek a nih thu leh 6 dang pawh a sakna tur hmunhma remchan dan azira sak tur a nih thu te a sawi a. EMRS kalpui mekah hian tui thianghlim lakna leh a panna kawng black topped chu sikul pahnih chiah a ni, tiin, EMRS zawng zawngin heng mamawh zual bik hi an neih vek theihna’n hma laksak turin Union MoS for Tribal Affairs hi a lo ngen a ni.