Vote chhiar turin Aizawl inpeih

MLA inthlanpuia vote tla chhiar turin Aizawl district a inpeih a, vote chhiarna hmanruate dah luh hmabak a ni.
Nilainia Counting Hall thenkhat tlawhnaah vote chhiarna dawhkan leh a chhiartu turte awmna tur leh counting agent-te indaidanna siam zawh a ni tawh a, vote chhiar tura hmanraw ngaite dahluh hmabak a ni.
Aizawl district-a Assembly constituency 12 awma vote tla hi hmun thum – Aizawl DC pisapui, Assembly Secretariat Annexe leh Govt. Aizawl College Sikulpuikawnah te chhiar a ni dawn. Vote tla hi Aizawl West II leh III chu round 2-a chhiar zawh tum niin, a bak bial dang zawng chu round 3-a zawh tum a ni.
Aizawl West-I bial chu polling station tamna ber niin 33 a awm a, Aizawl East-II bial chu polling station tlemna ber niin 19 a awm. Counting Hall-ah Aizawl West I, II leh III chu dawhkan tamna ber niin dawhkan 14 theuh chhawp a ni dawn a; Aizawl East II-a vote tla chhiarna tur chu dawhkan tlemna ber niin 7 chhawp a ni dawn.
Aizawl district-ah hian polling station 321 a awm a, heta vote tla hi dawhkan 135-a chhiar a ni dawn. Counting round hi a vaiin 34 a awm dawn a. Vote chhiarna hmun tur Conting Center hrang hrangah, Aizawl DC building-ah vote chhiarna hmun a tam ber a, bial 6 – Aizawl North II, Aizawl North III, Aizawl East I, Aizawl East II, Aizawl West I leh Aizawl West II chhiar a ni dawn a; Assembly Secretariat annexe-ah bial 4 – Tuivawl, Aizawl North I, Aizawl South II leh Aizawl South III chhiar a ni dawn. Govt. Aizawl College-ah bial 2 – Aizawl West III leh Aizawl South I a vote tla te an chhiar dawn a. Counting Hall hi a vaiin 12 a awm dawn a ni.