WC qualifiers-a Brazil chakpuitu Vinicius

WC qualifiers-a Brazil chakpuitu Vinicius
Ningani, keini Zirtawpni zing khan Brasilia khawpuia FIFA World Cup South American qualifiers match-ah mualneitu Brazil chuan rim taka thawkin an mikhual Colombia lakah 2-1 hnehna an chang hram a, hun tawp dawn tak taka Vinicius Junior goal an chakpui.
He result hmang hian South American qualifying table-ah Brazil hian point 21 hmuin pahnihna an luah chho a, he thu buatsaih laia Uruguay nena an inkhel result hriat hman loh hmahruaitu Argentina lakah Brazil hi point liin an hniam a, pathumna Uruguay nena an inthlauhna pawh tunah chuan a danglam thei tawh dawn a ni.
South American World Cup qualifiers kal laiah Brazil hi an chetha tawk lo a, vawithum ngawt 1-1 draw an nei zawn hnuah chak mamawhna sang em em chungin an khawpui berah Colombia an mikhual a; tan phat atanga nawr nghal an nih avangin a tir lamah Raphinha goal hmangin hma an hruai mai a, mahse, Liverpool forward Luis Diaz chuan away team siphurh a sut a, home team lamin an khung belh theih mai tak loh avangin 1-1 draw nen bawk an tawp leh dawn nia ngaihna a piang hman!
Hun pekbelh minute kuana a kal mek tihah chhandamtu Vinicius a lo lang a, Brazil chakna goal hlu zet a rawn khung ta a ni.
Tarlan tawh thin angin, United States, Mexico leh Canada-te inthlentawm tur 2026 FIFA World Cup-ah hian a vawikhatna atan team 48 zet an inlan dawn a; South America khawmualpui bik atang hian point hmu sang parukte chu direct-in an qualify ang a, pasarihna pawhin qualifiers round dang kaltlangin tlin theihna chance a la nei dawn.
World Cup-a vawinga champion thei awmchhun Brazil hian South American qualifiers-a beisei an phak loh avangin Colombia lakah khan chak an mamawhna a sang hle a; tarlan tak angin, bul pawh an tan khawng a, minute rukna lekah Vinicius Jr chu box chhungah Daniel Munoz chuan titluin, mualneitu team hian penalty an hlawhchhuak a, Raphinha chuan chhuihlutin mualneitu team-in hma an hruai hma hle.
Brazil hian goal dang khungbelhna hun remchang hmu mah se minute 13-naah Rodrygo chuan goal ban hrulah a petchhuak a, hei bak chance tha hmuh an harsat zui.
Counter-attack hmangin Colombia lamin Brazil goalkeeper Alisson-a tawmna box an run fo a, chawlhlawk hnaih tawh minute 40-ah player tawnhriat ngah James Rodriguez chuan Newcastle midfielder Joelinton-a concentration hloh lai nangfuhin ball a chhuhsak a, Diaz-a tan ball chhawpsakin, mikhual team-in first half-ah an siphurh an sut theih phah.
2nd half-ah Brazil came back rawn pui chho viau dawn thin mah se Vinicius Jr-a goal tur chu Camilo Vargas chuan pui takin a dansak.
Kum khat kalta maia an rawih tan Dorival Silvestre Junior chuan Brazil a chakpui zo lo leh takngial dawn nia a lan hnuah Vinicius chuan mualneitu team chakna goal hlu tak a thun.
Brazil hian Thawhlehniah an hmelma hlun Argentina an luhkhung zui leh dawn a, he match-ah hian Colombia laka yellow card hmu pahnih Arsenal defender Gabriel Magalhaes leh Newcastle midfielder Bruno Guimaraes-te an chhawr thei dawn lo.