West Ham leh Lopetegui an inrem

London club West Ham United chuan season tharah manager thar an nei dawn a, an manager thar tur chu Spain, Wolves leh Real Madrid manager hlui Julen Lopetegui a ni.
Manager tawnhriat ngah David Moyes hnuaiah West Ham hi an khel tha lo viau a, EPL an khelh hnuhnung vawi kuaah vawi khat chiah an chak. Europa League quarter-final-ah an thlak hnuin Moyes dinhmun a derthawng tan a, EPL-ah an khelh that theih loh zui vangin a dinhmun a him lo leh zual. EPL an khelh hnuhnung ber Pathianni zan khan Chelsea lakah 5-0 ngawtin an tlawm zui leh bawk. Heti a nih vang hian an manager rawih mek David Moyes hi season tawp ruala chhuah tir an titlu ta a ni.
Moyes a chhuah dawn tak vangin Hammers hian manager thar an zawng nghal a, an manager thar atan Lopetegui an dawr fel tawh. Hammers manager thar tur Lopetegui hian kum 2016-18 chhung khan Spain national team a enkawl a. World Cup 2018 tan tirh teah RFA hriatpuina lova Real Madrid nen an indawr vangin Spain hian an ban zui nghal. Real Madrid hi kum khat a enkawl a, hemi hnu hian La Liga club Sevilla a enkawl zui leh bawk. Seviila hi Europa League-ah a champion pui, Sevilla atanga a chhuah hnuin EPL club Wolves a enkawl zui leh a, Wolves hi EPL-ah 13-na a nihpui. 2023-ah Wolves a chhuahsan hnuin club enkawl a nei zui rih lova, EPL-ah bawk kir leh in, West Ham a enkawl dawn ta a ni.
West Ham leh Lopetegui te hian a thuphungin inremna an nei tawh a, contract erawh an la ziak fel rih lo thung niin tarlan a ni.