Wetlands Day pualin hmang

Mizoram EIACP Hub- Mizoram Pollution Control Board (MPCB) leh Govt. Zirtiri Residential Science College (GZRSC) Eco-club, Department of Botany & Zoology tangho buatsaihin Zirtawpni khan World Wetlands Day 2024 pualin Govt. ZRSC hmun, Leitanah hun hman a ni.
Mizoram EIACP Hub – MPCB programme officer Benjamin Lalnunsanga Colney chuan kum 1997 atangin kumtin February 2 chu ‘World Wetlands Day’ atan hman thin a ni tih a sawi a. Mizoramah wetlands 88 vel awmin, chu’ng zinga langsar zual leh tlawhtu ngah zual – Tam dil, Palak dil leh Tlawng lui chu vawng thianghlima tibawlhhlawh lo turin mitin a ngen. Wetland vawnhim leh humhalh nan a vela ramngawte zuaha thing phun uar a pawimawh tih a sawi bawk.
Resource person-a hman associate professor Dr Lalzahawmi Chenkual chuan mihring tan leh kan leilung tana wetlands pawimawhna sawiin, mihring hriselna leh rilru lam thlenga a nghawng theih dan, sik leh sa nena inkungkaihna, wetlands chhe tur leh tlem zel tur venhim leh humhalh dan tur sawiin, Mizorama Ramsar site kan neih Palak Dil chungchang zirchianna a sawizau a ni.