Wholesale market sak theihna en

Agriculture minister PC Vanlalruata leh Enviroment, Forest & Climate Change minister Lalthansanga te chuan Inrinni khan Sihphir Venghlun, Phunchawng, Falkawn leh Mel 3-ah ‘Agriculture Produce Wholesale Market’ sak theihna hmun tur an enfiah.
Minister Lalthansanga chuan Aizawl dai vel mai ni lo, thingtlang lamah kuthnathawka ei zawng tamtak an awm a, thlai thar hralh chungchangah harsatna an tawk nasa thin a. Heng thlai thar hi wholesale market kan neih chuan a hralhna kawngah hmasawnna a awm phah ngei a beisei tih a sawi.
Minister PC Vanlalruata pawhin wholesale market hman tangkai dan tur hrang hrang sawiin, “Thlai thar vawnthatna – cold storage leh kuthnathawktute hah chawlhna – rest room bakah market building chhungah ATM booth dah tum a ni a, heng hian kuthnathawktute tan malsawmna thar a thlen ngei kan beisei,” a ti.
Agriculture Produce Wholesale Market hi RKVY Scheme atanga sak tur niin, Mizorama thlai tharte Aizawl kawtchhuah hmun li-ah sak a ni dawn a, Aizawl North leh South chu hmalakna hmasaah an hmang dawn a ni.