Women’s Ballon d’Or nominee puang

Kumin World Cup-a champion zo ta lo England player pali lai an lang a, chu’ngte chu Millie Bright, Rachel Daly, Mary Earps leh Georgia Stanway-te niin, Women’s World Cup final khelte vek kha an ni.
Kum 2023 chhunga hmeichhe footballer tha bera thlanchhuahin an dawn tur women’s Ballon d’Or nominee puan takah hian Republic of Ireland captain leh Arsenal player ni bawk Katie McCabe pawh a tel.
England player pali tarlan takte khian Lionesses chu 2023 Women’s World Cup final thlenpui mah se Spain lakah team an chakpui zo lo.
Aston Villa player Daly hian season liamta khan Women’s Super League-ah top scorer lawmman dawngin, PFA Players’ Player of the Year atan thlan a ni bawk.
Manchester United goalkeeper Earps chuan kha tournament-ah khan match li chhung ngawt goal a chhuah lo a, keeper tha ber lawm-man Golden Glove award a dawng.
Women’s Ballon d’Or dawng thei tura chhawpchhuah zingah Spain leh Barcelona midfielder Aitana Bon-mati pawh telin, ani hi tunhnaia Uefa Wo-men’s Player of the Year atana thlan-chhuah kha a ni a, Ballon d’Or atan pawh rinkai a ni leh mek.
Bonmati chipui Alexia Putellas chu kum hmasa pahniha he award dawngtu ni mah se hliam avanga a chawlh rei avangin kumin hian niminee zingah a lang ve ta lo.
Kumin World Cup-a goal nga khung chunga top scorer lawmman Golden Boot dawngtu Japanese Hinata Miyazawa pawh nominee zingah telin, kum 23-a upa midfielder hian tunhnaiah Women’s Super League club Manchester United a zawm.
Shortlist-a lang ve dangte chu – Manchester City player pathum Yui Hasegawa, Jill Roord leh Khadija Shaw, Chelsea star pahnih Sam Kerr leh Guro Reiten, Arsenal player Amanda Ilestedt leh Daphne van Domselaar of Aston Villa-te an ni.