Lallunghnema
Charity Lodge
Cont: 9862288182
-- Advertisement --
Ka article chhuak hnuhnung berah khan World Consumer Day lo chhuah dan leh hman tan hun leh Nî te ka rawn sawi thuak thuak a, ka tawnhriat ka sawi bawk.
He World Consumer Rights Day hian khawvel pumah lawm a hlawh tial tial a. Mizoramah pawh kan hmang uar sawt hle. A lawmawm e. A ni dik taka hman a rem loh avangin Aizawlah chuan March 17 (Monday)-ah Vana Pa Hall-ah hman a ni a. Hetah hian Khuallian chu Hon’ble Minister Food Civil Supplies & Consumer’s Affairs a ni a. NGO hrang hrangte an tel a, Consumer Pawl leh Consumer Club-te an kal tha thaw khat viau. Keini Centre For Consumer Education pawh min sawm angin kan kal ve a. Min duhsak a, thutna tha tak, tlar hmasa berah kan inhung ve a. Kan langsar ve phian a, a tha viau mai. Tih pa taka (practical) hma latu kan nih ve na laiah min duhsak hi phu ve tho chuan kan inhriat a ni. Ka thawhpui tam tak zingah activist duhawm tak Pu Rohnuna nen kan theih ang angin consumer-te tan kan insawr chhuak ve thin a. Uang pui chang lo ila, kan buaipui tawk complaint hi kan dawng reng a ni.
Ka thawhpui Pu C. Rohnuna sawi tâkah chuan a message dawn hi ka lo tarlang dawn a ni.
“Sir, hei i zarah vawiin khan kan nau marksheet chu an va la chhuak ta e. An lo fel khawp mai, biak an nuam, a duh chuan session tharah pawh admission fee ngai lovin rawn zawm leh rawh se, tiin an lo thlah thlap e, kan lawm khawp mai. Kan tana i inpekna hi kan theihnghilh ngai lovang. Lalpa’n malsawm zel che rawh se. “ tih hi a ni a. Ka thianpa hi consumer activist huaisen tak mai a ni a. Hriat tamah a sang lua lo mai thei. A hriat leh vawn tawh hi chu a theih nghilh ngai lo va. A umzui chat chat zel a ni. |um khat pawh a lên chhuahna veng pakhatah hian bûk hmasak lohvin Gas an lo sem a. A thawk lawka Gas semtute chu a bûktir hmiah hmiah mai a ni. Hetiang mi huaisen kan nei hi a vanneihthlak hle. |um khat chu Tuikhuahtlangah kan kal a, 2wheeler taxi hian a hran ve veah kan chuang a. Kei ka kal hnuhnung zawk a. Tuikhuahtlang ka thlen chuan Taxi pu nen an lo indawr mek a. “Rate dik tak bak ka pe lovang che” Pu Hnuna hian a ti ta tlat mai a. Taxi pu chuan amâ rate aia hniamin taxi fair chu a la ta a ni.
Tichuan, kha World Consumer Day kan hmanah khan Resource person Prof. James LT Thanga, MZU chuan paper a present a. Chu a paper present thupui chu A JUST TRANSITION TO SUSTAINABLE tih a ni a. Mizo tawng chuan ‘Khawvel danglam zel hmachhawn tura innghahna tlak leh tlo buatsaih’ tihna a ni mai âwm a. A hlawkthlak hle. A ngaihnawm bawk. Hemi chungchang hi hun remchang hmasa berah sawi ka tum, Pathianin rem a tih chuan.
Tun thla March 11 khan State Advisory Committee, MZERC meeting kan nei a. Ni 12-ah petition hearing neih a ni bawk a. Kumin atan chuan tariff thar book a ni lova, ‘Electric bill tihsan a ni dawn lo’ tihna a nih chu. Mizoram sawrkarin consumer te a chhawk zangkhai leh rih dawn a ni ber. MZERC kan nei ta a, Er Tlumtea leh Er Thianga ten an ho hneh hle dawnin ka hria. An staff -te pawh an fel hlawm khawp mai. Mipui tana thawktu an ni a. Chhungkaw tin nghawng Power chungchangah ngaihtuahna an seng hle a ni. Power hi mipui innghahna ber a ni hial awm e. Chuvangin MZERC leh P&E hi kan rilruah lo lian ber zel rawh se.
Kan thupui pakhat sumdawng rinawm tih hi i han khel lawk dawn teh ang. Sumdawng Dawrkai rinawm ni tur chuan hengte hi neih a tul khawp mai.
Sumdawng rinawm chuan a tha thei ang berin awmdan mawi leh awmdan tha a vawng tur a ni. Hawihhawmna te, Dawhtheihna te, Insumtheihna te, Thuhnuairawlhna te, Inngaihtlawmna te, Zahngaihna te, Zaidamna te, Zahawmna te a nei tlat tur a ni. Customer-te rilru tina turin dawrkai emaw sumdawngte chu dan khawsa tur a ni lo. Midangte tan malsawmna nih chu an thupui a ni tur a ni.
Sumdawng tu pawhin Rinawmna leh Zahawmna an vawng tlat tur a ni. Sumdawng tu pawh, thil zuar a, dawr nghaktu a nih chuan a bungraw zawrh lai man thu hlaah dik tak leh nghet takin a kalpui tur a ni. Thil man tihsan zung zungte, buk dik lo te, man phuah chawpa zawrhte hi chin miah loh tur a ni.
MRP ngaih pawimawh hi sumdawng tha mi ze nghet ni se, a duhawm hle.
Sumdawng tha chuan thupuiah heng hi a nei thin:
Customer is King’
Customer Satisfaction is our motto Customer is our VIP
Dawr pakhat bangah hian fiah tawkin ‘Customer Satisfaction is our motto’ tih hi an lo tar a. Anmahni chu ka han dawr ve a, dawr an nuam hle mai. Duh aia tam ka lei mai dawnin ka hria a. Cash memo ka lak pah chuan comment ka siam zung zung a. An thil tar avanga ka dawr thute chu ka hrilh mawlh mawlh a. Lawmthu kan inhrilhtawn a ni ber e.
He Dawrkai rinawm leh tha, entawn tlak hian a hlep tlem a, a hralh tam thung. Dawrtu a ngah a, a tilawm tam bawk. Consumer-te tel lo chuan a hlawhchham dawn tih a inhriat chian em avangin a thupui pawh ‘mi dangte tana malsawmna’ tih a ni a. A hlauh ber pawh customer tih thinrim a ni. Hetiang mi hi sumdawng leh thil zuartute, service provider zingah hian 100-a ui hum zat tal awm se, kan va ti em!
Consumer-te tana meichher chhi eng turin CENTRE FOR CONSUMER EDUCATION a ding a. Harsatna i neih chuan inthlahrung lovin hrilh zel ang che.