World Consumer Rights Day

Vawiin hi World Consumer Rights Day a ni. Kum 1983 atanga hman tan kha a ni a, kumin hi a kum 43-na a ni.
India ramah hian 1986 atangin Consumer Protection Act kan nei tan a, kum 33 zet kan hman hnuah dan hi thlak hlawk (Repeal) niin, dan thar Consumer Protection Act, 2019 (CPA 2019) a lo piang leh a. Dan thar hnuaiah hian consumer-te dikna leh chanvo tihdanglam a awm lova, consumer-te hamthatna tam tak belh a ni zawk.
Mizote hi Dan hriatna leh chhawr tangkai kawngah kan la hniam hle. Tuna CPA 2019 pawh hi FCS &CA Department leh Mizoram Consumer Union ten Mizo tawngin an dah a, mipui lam hian kan bengkhawn em em lo niin a lang.
Tun hnuah hian consumer-ten kan dikna leh chanvo humhalh nachang kan lo hre chho tan ve ta a; mahse, kan la taima tawk lo hle. Consumer Rights chungchangah awareness campaign pawh ngawrh taka kalpui a lo ni tawh thin a. Maximum retail price aia toa thil zawrh leh hralh chu dan kalh a ni tih te, expiry date pel tawh hralh te, bukna dik lo (buk lung atana thildang hman etc) te pawh kan ni tin nunah a thleng reng a, social media lama tarlan duhtawk mai kan la thahnem hle. Chutih karah mi tu te emaw thahnemngaite chuan thuneitute pun nachang an hriat avangin an hlawkpui ve mek bawk. A tlangpuiin, dik lo taka sumdawngten thil an zawrh leh an hralh chungchangah buaipui zui peih lova thlir liam ta mai hi a mipui mimir tam zawk hi kan la ni awm e.
Hei hi kan dinhmun a la nih miau avangin sumdawng zingah dan kalha thil ti duh hi an la tam phah niin a ngaih theih.
Thil lawmawm tak chu, vawiin World Consumer Rights Day hi Inrinni mah ni se, District Consumer Protection Council Lawngtlai chuan hman an tum a, consumer rights awareness a tam thei ang bera kalpui an tum nghe nghe a ni.
Vawiin World Consumer Rights Day hi Inrinni, bazar pui ni a ni a, consumer-te pawhin he ni tangkai taka kan hman liam theih nan, consumer rights hre ran chungin hun hman i tum ang u.