World Food Safety Day hmang

June 7 kha World Food Safety Day a ni a, khawvel hmun hrang hrangah he ni hi hman niin, College of Veterinary Sciences & Animal Husbandry (CVSc&AH) Central Agricultural University, Selesih Aizawl chuan an hmang a, CVSc& AH dean in-charge Prof Ayub Ali chuan a hmanpui.
World Food Safety Day hmannaah hian zirlai, zirtirtu leh thawktu dangte an tel a. CVSc & AH assistant professor Dr Lallawmzuali Ralte chuan kumin thupui “Food Safety: Prepare for the Unexpected” (Eitur Thianghlim leh hrisel: beisei loh taka hun khirh leh harsa hmachhawn a tul pawha lo inbuatsaih lawk dan) tih chu powerpoint presentation nen a sawifiah a ni.
Ziraite pualin quiz intihsiak buatsaih a ni a. World Food Safety Day thupui leh food safety chungchangah inelin, 1-na Dr Thiyam Ramesh Singh (PG zirlai), 2-na Rahul Kumar Giri (3rd Year BVSc &AH), 3-na Treiborbah Khongmalai (3rd Year BVSc &AH) leh Rajkumari Kebisana (3rd Year BVSc &AH) zirlaite an ni.
World Food Safety Day hi kum 2019 atanga hman tan niin, kumtin June 7-a hman thin a ni a. Food and Agricultural Organisation leh World Health Organisation tangdun buatsaih a ni. Khawvelah ei leh in tur thianghlim leh hrisel kan ngaipawimawh deuh deuh a, heng ei turte hian kan hriselnaah nasa takin nghawng a nei a ni tih mipui mimir inhrilhhriata inzirtir nana hun hman thin a ni.