WORLD VETERINARY DAY 2024 PUAL: Mihring leh ran hriselna atan Veterinary Doctor te hi hnathawktu pawimawh tak an ni

Dr. Lallawmzuali Ralte
Dr. Nancy Laldinpuii
Dr. H. Lalawmpuii
College of Veterinary Sciences & Animal Husbandry,
Central Agricultural University, Selesih, Aizawl, Mizoram.

World Veterinary Day (WVD) hi kum tinin April thla Inrinni hnuhnung ber ah hman thin a ni a, kumin pawh 27th April hian khawvel pum huapin hman a dawn a ni. World Veterinary Association (WVA) chuan World Veterinary Day hi kum 2000 atang khan a lo hmang tan tawh a ni.
Tun kum World Veterinary Day thupui (theme) puan chu “Veterinarians are essential health workers” tih a ni a, a awmzia chu “Mihring leh ran hriselna atana Veterinary Doctor te hi hnathawktu pawimawh tak an ni” tih hi a ni. Kum tinin World Veterinary Association (WVA) leh Health for Animals (OIE) ten WVD thupui hi an lo puang thin a ni.
He thupui hi puan a nihna chhan chu tunlaiah mipui mimir ten hriselna an ngaipawimawh tawh em em a, chuvang chuan kan ei leh in te hrisel leh thianghlim taka thar chhuah a nih theih nan ran hrisel sa, bawnghnute leh artui te kan ei ngei ngei a ngai tawh a. Mithiamte chhut dan in ran leh mihring laka natna inkaichhawn theih natna (Zoonotic diseases) hi 70% aia tam hmuhchhuah a lo nih tak si-ah chuan, mihringte kan lo hrisel chhoh zel nan Veterinary profession hi a lo pawimawh ta em em a ni. Puipun nikhua entirnan: Hun pui kan neihte – Krismas leh kumthar lawmte, mo lawm leh inneih nite, birthday lawm te leh a dang hrang hrang hun puiah te hian sa tellovin a tih hleih theih tawh loh a, chuvang chuan sa thianghlim tak, bawnghnute leh artui thianghlim leh hrisel tha tak nei tur chuan uluk taka ran vulh leh enkawl sa kan in hlui a ngai tawh a, chuta tan chuan Veterinary Doctor (Ran Doctor) te hi an pawimawhin mipuite laka an mawhphurhna hi a sang em em a ni.
Veterinary hna (profession) a pawimawhnate hlawm lian pathumin lo then ta ila.
Hriselna hnar kaitu pawimawh tak pakhat an ni (Health):
Ran hriselna (Animal health): Ran hrisel tha tak nei tur chuan Vety doctorten mawhphurhna lian tak an nei a, ran hrisel tha chuan – sa, bawnghnute leh artui hrisel min pein kan lo thar chhuak thei dawn a ni.
Mihring Hriselna (Human health): – Mizote hi sa ei mi tak kan ni a, sa, bawnghnute leh artui thianghlim leh hrisel kan ei chuan, sa leh a kaihhnawih atanga natna mihringin kan kai tur lakah kan lo fihlim ang a, kan lo hrisel dawn a ni.
Kan awmna leh kan chhehvel thianghlimna (Environment hygiene) hi kan sawi bang thei lo a, ran leh mihring hrisel tak chuan hmun hma thianghlim leh hrisel a a chen ngei ngei a ngai bawk a.
Heng Ran, Mihring leh Chenna hmunhmate hi lak hran hleih theih loh inkungkaih tlat an ni a, an vai hian a pawimawh em em a ni.
Ina kan ran vulhte a bikin ui leh zawhte te hian natna min thlen thei ve tho a, ui a hri (Rabies) te leh natna hlauhawm tak tak kan kai tur laka min veng thei tut e chu Vety doctor te bawk an ni.
Zoonotic diseases chu ran leh mihring inkara natna inkaichhawng thei natna te hi zoonotic diseases an ti a ni. Tin, mithiam ten 70% aia tam hi zoonotics a ni e an ti a. Chuvang chuan Ran leh mihring hriselna khaikhawmtu “One Health” hi a pawimawh ta em em a, heng zoonotic diseases laka mihring kan lo fihlim theih nan hian mihring doctorte leh ran doctorte an thawh ho tlat a ngai a ni. Heng natna inkaichhawn theih thil ah hian Vety Doctor te hi lang lo lamah mawhphurhna an neiin an pawimawh em em a ni.
One Health – Memorandum of Understanding (MOU)
Kum 2012 October ni 13th khan World Medical Association and World Veterinary Association te chuan kumkhuaa hriat reng tawh tur Thuthlung (Memorandum of Understanding) (MOU) an sign ta hial a chu chu “One Health Memorandum of Understanding (MOU)” an ti a ni. Hetah hian WVA President, Dr. Faouzi Kechrid leh WMA President, Dr. Dr. Cecil B. Wilson te chuan WVA-WMA Memorandum of Understanding hi an sign ta a ni. He an thuthlunnaah hian “Khawvel pum huap a, Mihring leh Ran laka natna inkaichhawn theih reng reng lakah hian kan thawh ho a tulin kan thawk ho tlat tur a ni” tiin thu an thlung ta a ni.
Ei leh in him, thianghlim leh hrisel (Food Safety):
Food safety chu science thiamna hmanga ei tur chi hrang hrang kan hriselna atana sawngbawl emaw siam leh vawnthat a, natna chi hrang hrang laka kan taksa venhim hi a ni. Kan chaw ei leh sa eite, kan thil ei hrim hrim in kan taksa tan natna min thlen dawn lo a ni tih kan hriatchiansa na kha food safety chu a ni.
Kan ei leh in thianghlim tawk loh avangin natna chi hrang hrang kan kai thei a, chungte chuan thihna hial te pawh min thlen thei a ni. Kan ei leh in avanga natna kan lo kai hian Food poisoning tiin kan sawi thin a ni. Food poisoning hi ram changkang apiangah a tlem a, ram thanglai (developing countries) ah a tam deuh bik. Mithiam ten Food poisoning hi 100% a venhim theih an ti tlat thung.
Kum 1983 khan International Convention Joint Meeting chu Food and Agriculture Organization of the United Nations (FAO) leh World Health Organization (WHO) ten neiin thu tlukna an siama, “Ei leh in bawlhlawh leh thianghlim tawk lo atanga natna kan kai hi natna darh zau leh harsatna khawvel pum huap anga mipuiin kan tawn mek leh kan ram sum leh pai (economy) dinhmun nghawng thei thil leh tlak chhiatna bulpui ber te zinga pakhat a ni” tiin thu an lo tithlu a ni.
Kum 1992 khan U.N. Conference on Environment and Development chuan “Ei leh in (food) hi natna kan in kaichhawnna awlsam leh natna kan kai chakna ber tih an hmu chhuak a, chuvangchuan khawvel pum huap angin mitin mipuite a tam thei ang ber leh a zau thei ang bera kan inzirtir hi a tul tak zet zet a ni” an ti.
Kum 2000 khan World Health Assembly, the supreme governing body of WHO, chuan resolution pass in Food safety hi Mipui Hriselna (Public Health function) pawimawh lutuk a ni tih a lo puang ta hial a ni.
He Food safety kan neih theih nana mawhphurhna lian tak neitute chu Vety Doctor te an ni a. Farm-a ran vulh chu hrisel taka enkawl leh vulh te, thianghlim taka talh a zawrh chuah a, mipui te hnena hlan chhawngtu pawimawh em em an ni a. Ran talh tur reng reng a hrisel in a thianghlim tawk em? natna vei an ni em? mihringte ei atan a thianghlim tawk em tiin Ante- mortem exam thlap tute hi Vety Doctor te an ni a. Sa talh lai a sa talh leh a sa kawchhung a thianghlimin a hrisel tha em tih Postmortem exam-na neitute hi Vety Doctor te tho an ni. Heng sa talh leh hralh tur lo endik thlap sa ei ngei hi mihring hrisel nan a pawimawh em em a ni.
Chutiang bawkin Bawnghnute leh artui te pawh hi chaw tha leh hrisel an ni a, naupang thanglai te, nu naupai tan te, tar chak lo leh damlo tan te chaw tha leh pawimawh em em te an ni. Amaherawhchu, heng bawnghnute leh artui te hi a thianghlim tawk em? Natna lakah an fihlim em ? Mihringte tan ei tlak a thianghlim leh hrisel an ni em? Heng eitur te hi hrisel leh thianghlim taka chhawp chhuah a nih theih nan hian Vety doctorte mawhphurhna a sang em em a ni.
Ei leh in hniarhnar (Food Security):
Khawvel pum huap mipui ten ei leh bar kan lo hnianghnar a, ei tur tha leh thianghlim, hrisel bawk si, kan ban phak leh kan lei theih tura a awm avanga taksa, rilru leh thlarau hahdam leh thlamuang taka kan awm theihna hi Food Security chu a ni a.
Kan hriat theuh angin khawvel pumah mi za zela 78 te hi sa ei mi (non vegetarian) anga chhut an ni a. Chumi awmzia chu heng mite hian ran atanga kan ei tur thar chhuah thin sa, bawnghnute leh artui te hi kan ei in kan in thin tihna a nih chu. Chutiang taka eitur, mihring hriselna atana pawimawh a lo nih takah chuan a thar chhuahna kawngah Vety Doctor te hian mawhphurhna sang tak an nei a ni.
Tin, tuna kan awm dan leh tih dan hian nakin hun lo thleng tur a hril kan ti fo thin a. Sa, artui leh bawnghnute hnianghnar taka kan thar chhuah theih nan hian Vety Doctor te hian ran chi tha thlan atanga, a chaw pek dan leh enkawl dan te, a natna ven leh ran damlo enkawl thlengin mawhphurhna sang tak an nei a. Tin mizo ten a kan tih fo thin chawhmeh a tam laia dahthat a, a awm loh huna kan ei thin ang hian ran atanga ei tur kan thar chhuah te pawh hi a chhiat mai loh nan a sawngbawl leh dahthat dan te pawh Vety doctor te thiltih pawimawh tak te zing ami a ni kan ti thei ang a. Hetiang anga ei tur hnianghnar taka kan thar chhuah a, a chuang liam kan lo neih pawh a dah that dan tur dik tak leh a hlutna sang zawk nei (value addition) Sa leh Bawnghnute atanga ei tur siam chhuah (meat and milk products) chi hrang hrang sausage te, nuggets te, paneer te, dahi te, lassi te leh a dangte kan siam thei zel anih chuan kan ram sum leh pai dinhmun (economy) in hma a sawn ang a, mipuite khawsak leh nunphungin hma a lo sawn thei dawn a ni.
A tawp ber atan chuan Veterinary doctorte hi hmuh theih loh piah lamah hriselna hnar kaitu pawimawh tak pakhat an ni a, ran damlo enkawlna piah lamah sa, bawnghnute leh artui hrisel tak thar chuak a, mipuite hnena pe chhuaktu leh mihring hriselna kawnga hma latu pawimawh tak pakhat an ni. Kan lawm e.