Wrestling championship sub-junior-ah Serchhip district an chungnung

Inter District Wrestling Championship vawisarihna ni hmasa berah Nilaini zan khan sub-junior inelna zawh fel nghal niin, gold medal panga nen medal pakua lain Serchhip district an sang ber.
Inelna dang ngaihven hlawhah Mizo palian inchai champion Lalsangliana cho tur zawn a ni. Mi pali tel tura beisei an nih laiin pathum ziahluh an ni a, North Vanlaiphai inchai chak Lalrinchhana Sailo chuan Zokhawthar tlangval Laldinthara a bawhbet.
Nilaini chhunah LPS Arena, Falkland-ah hawn a ni a, zanah chhunzawmin, kum 15 hnuai lam inelna an zo nghal a, gold medal 10 an semchhuak. District pasarih telin Serchhipin gold awm chanve panga bakah silver leh bronze medal pahnih ve ve an la a ni.
Kolasib district-in dawtin gold pathum leh bronze pakhat an dawng a; pathumnaah championship thlengtu Aizawl an awm a, medal 15 dawng mah se gold pahnih chauh telin silver pasarih leh bronze medal paruk an hlawhchhuak.
Zanah Mizo inchai title chuh tur zawnna buatsaih tan a ni a, thawh thum zel an inbei. Palian inchai hmasaberah thawhhnihna a tawp thlengin point a awm lo a, thawh hnung berah Rinchhana’n vawi 10 chhiar thlengin Dinthara a bawhbet a, chiang takin a chak.
A vawikhatna’n title chuh thei turin Rinchhana’n hmabak a nei tam tawh lo. He thu buatsaih lai hian Lunglei tlangval Lalremtluanga nena an innuai result tarlan hman a ni lo a, a chak a nih chuan a tlang ang. Kum 33 mi Sangliana hmaa ding tur zawnnaa tel palian pathum an inchai kual vek a ni.
Palaihawl title chuh tumin mi panga an tel ve thung a, Saitual inchai chak Ngursangzuala’n harsa lo takin Ramropuia (Mamit) lakah 10-1 hnehna a chang. Semi-final lamah Ngura’n Vanlallawma (Muallungthu) a hmachhawn a, lehlamah RB Lalthansanga (Muallungthu) leh Jeho Zonunsanga Ralte (Ailawng) inchai result tarlan hman a ni lo bawk.
Pate title chuh tumin mi pariat an tel ve thung a; engemawchen title kawl tawh Lalchhanhima’n mi thar Nazareth Lalthazuala lakah inlehthalna a pumpelh hram a, 4-3-in a chak.
Saitual chhuanvawr Chhanhima hian thawh khatnaah thiamna a neih chhawrin point li a hmu nghal a; combat sports hrang hrang khel kual nasa tak Zemabawk tlangvalin nawrletin thahrui a nei a, thawh thumna thlengin a fei a, mahse, tawnhriat a tlachham a, point thum bak a hmu ve hman ta lo.
Republic Veng inchai chak Lalhmangaihzuala’n 6-4-in amah aia tawnhriat nei Lalhruaitluanga (Kolasib) a hneh ve thung a; a tir lamah hniam zawk mah se thahrui nei leh chau har zawk a nihna chhawrin a tuan a tha zawk bawk a, semi-final bout-a Chhanhima hmachhawn thei turin a tlang.
Champion tawh Bulfekzawl inchai chak Lalawmpuia’n title lakkir a tumna a puitling zo lo nghal teuh hle a, Jacob Lalrinliana (Venghlui) nen thawh thum an inchai zawh thlengin 4-4-in an inhnehtawk. Inbanphawi hmangin chak zawk an zawng a, Awmpuia a tlang hram.
Saitual tlangval Johny Lallawmkima’n harsatna lian tawk loin John Lalremmawia (Kolasib) a hneh ve thung a, 6-0-in a chak. Semi-final-ah Lawmkima’n ani aia hnuhma nei tha Awmpuia a hmachhawn a tul ta a ni.
Nimin chawhma dar 11 atang khan inter district junior leh senior inelna tan a ni a; nizan dar 8-ah thawh hnihna chhunzawmin, Mizo inchai title chuh tur zawnna kalpui leh nghal a ni bawk.
Inchai hi LPS 10 leh LPS youtube channel-ah live-a pekchhuah thin a ni.