YMA hi lo awm lo ta se

YMA Day vawi 90-na kan hmang dawn ta reng mai! Tun tum YMA Day chu Pathianni (June 15, 2025)-ah a tlak avangin branch YMA hrang hrangin mahni remchan dan ang zelin Inrinni leh Thawhtannia hmang turin ruahmanna siam a ni a.
YMA a lo din tan dan leh a din chhan te, thiltum tha tak tak leh thuvawn tha tak a neih dan te chu kum tin YMA Day a thlen apiangin kan inhrilh thin a, YMA member-te chuan kan bel tlang viau tawhin a rinawm.
YMA pawimawhna te, kawng hrang hranga ram leh hnam hmasawnna thawk chhuaktu a nih dan te, hnam kalphung leh ziarang (culture and tradition) vawn nun kawnga thawh hlawk ber a nih dan te leh, thil dang dang, political level-a sawrkar nena thawhhona tangkai leh hlawk tak tak neih a nih dan te, thil dang tam tak, a, sawi sen a ni awm lo ve, kan hre tlang vek a nih hi.
YMA pawimawhna leh tangkaina hi kan sawi thin a, a nihna tak zuk hre chiang tur chuan, “YMA hi lo awm lo ta se” ti zawnga kan thlir let hian a chiang ber awm e.
Chumi hrechiang tur chuan YMA a din tirh kum 1935 atanga YMA thiltih (activities) zawng zawng kha han thai bo nghauh nghauh ila, YMA thatzia a lo lang chiang berin a rinawm.
YMA thiltum leh a dinchhan heng ‘hun awl hman that, Zofate hmasawnna ngaihtuah, Kristian nun dan tha ngaihsan’ tih te hian a huap zau hle a, YMA lo awm lo ta se, eng tin nge Mizoram leh Zofate hi kan awm ang? tih han ngaihtuah ila, tuna kan dinhmun chanve pawh hi kan pha ngutin a rinawm loh.
YMA thuvawn “YMA chu tanpui ngaite tanpuitu a ni” tih phei hi chu, YMA hi lo awm lo ta se, tanpui ngaite a tanpui zawng zawngte hi ttanpui loh’ an ni vek dawn tihna a ni a, ngaihtuah ngam pawh a ni awm lo ve.
YMA Day puala YMA branch hrang hrangin ram leh hnam tana thil tangkai an thawh zawng zawngte pawh hi han hlip bo vek ta ila, Mizoram chu a kawrawng hle dawn tihna a ni bawk awm e.
Chuvangin, YMA hi a din chhan ang ngeia Zofate hmasawnna ngaihtuah leh tanpui ngaite tanpui kawngah tun aia nasa zawka a thawh theih nan mi tin hian i hlut zual deuh deuh ang u khai.
YMA vul zel rawh se.