Youtuber-te fimkhur turin chah

Politics chungchang mipui ngaihdan lak kawngah youtuber-te tan fimkhur a tul tih inthlan kaihhnawiha mithiamten an sawi.
Google News Initiative India leh DataLEADS chuan Zirtawpni khan Aizawla thuthar thehdarhtute tan inthlanpui kaihhnawiha hriat tur inhrilhhriatna an buatsaih a, mithiam sawmbik ten an zirtir.
Mizoramin kumin kumtawp lama inthlanpui a hmachhawn hunah journalist-te chuan thudik leh rintlak chauh puang darh thin tur leh political party tan bik nei loa thulai la taka news siam thin turin an chah a. Technology changkang chho zelah journalist-te pawhin bum an tawk ve thei a ni tih hre tur leh chutiang laka fimkhur turin an chah. Thudik lo leh belhchian dawl lo hrang hrang awlsam taka an hriat chhuah theih dan tur an zirtir a ni.
Mizorama youtuber-te chungchang sawitel niin, youtuber thenkhatin journalism kalphung hre mumal loa anmahni duh dan danin politics chungchang video an siam thin tih sawi a ni. Politics kaihhnawihah mipui ngaihdan an la kual ve ringawt zelte chu thil tha a nih loh thu sawiin, Mizo youtuber thenkhat chu fimkhur turin an ngen a ni.
Google News Initiative hian India ram mai ni lo, khawvel hmun hrang hrangah inthlan dawn apiangin state hrang hranga journalist-te training an pe thin a. Kum MLA 2018 inthlanpui hma khan India ramah hma la tanin, khawvel hmun hrang hranga journalist-te chu fimkhur tak leh uluk tak chunga news rintlak chauh thehdarh tura zirtir chu an tum ber a ni tih an sawi.
Inthlan chanchinthar buaipui dan tur zirtirna – Poll Check Election Academy 2023 hi inthlanpui hmachhawn hnai tur state 5 – Telangana. Rajasthan, Madhya Pradesh, Chhattisgarh leh Mizoramah buatsaih vek a ni dawn a ni.