Lallunghnema
Charity Lodge
Cont: 9862288182
-- Advertisement --
Consumer Huang min lo chhiarsaka min lo tuipuitu zawng zawngte chibai tha ber ka buk a che u.
Ka article chhuak hnuhnung berah khan dawrkai nu fel tak nena kan indawr thu ka ziak a. Kha nu khan a insawi danin an hnen atanga thil leitute lung lawmna an ngaihtuah thin thu min hrilh a. Khatiang dawrkai fel kha tunah hian kan zawng mek a, kan hmu zel bawk. He tih mek lai hian dawrkai leh sumdawng zingah ‘koham’ tak tak an awm a. Chungte chuan consumer-te tan harsatna an siam a, manganna nasa tak an thlen thin a ni. Kan dinna ni fo chu dawrkai leh sumdawngte hi mipui kuta innghat an ni a. Mipui tel lo chuan an hlawhchham tih hi a ni. Mipuite hi consumer an ni a. Consumer-te chu thil zuartu leh hralhtute innghahna ber an ni a. ‘Consumer is King of Seller’ tih hi a dik em em reng dawn a ni.
Hmanni lawk khan tlangval fel tak pakhat hian min phone a. Chuta a thusawi chu, “Ka pu, hei Consumer complaint nikum Aug. thlaa ka theh luh kha Consumer Commission hian thla 7 hnuah pawh chhuan lam eng eng emaw siamin min la tihfelsak lova, ka rilru a na hle mai. A tirah khan vawi 2 khatah khan tifel mai turah ka ngai a. I sawi ang khan social court a nih angin Consumer Commission hian min dispose-sak mai turah ka ngai a. Ka rawn hrilh che a ni,” tiin. He thil ka hriat hian ka sa deuh phat mai a. District Commission-a thawk President/Member te chu biak ka tum nghal ruai mai a. Mahse, ka be remchang ta lova. Hetiang em ema Complaint tihfel loh inchiah rei hi CPA 2019 sec. 38(7) bawhchhiatna a ni thei a. Hetianga case pending rei thu-ah hian vai ramah pawh Consumer Commission hmâah khin let an lo ni tawh thin, tih ka hriatin he social court-ah hian rei tak delay a rem lo tih thu hi ziah ka lo duh ta a ni a. Ka hman remchan veleh Consumer Protection Act 2019 chu ka han bih a. Hetiang hian section 38(7)-ah tarlan a ni a-
“Every complaint shall be disposed of as expeditiously as possible and endeavour shall be made to decide the complaint within a period of three months from the date of receipt of notice by opposite party where the complaint does not require analysis or testing of commodities and with five months if it requires analysis or testing of commodities” tiin.
Mizo tawng chuan “Complaint reng reng ni 90 chhunga chinfel tur, test ngai a nih erawh chuan ni 150 chhungin chinfel tur” tih hi a ni. Civil case anga rei tak ngaihtuah loh tur a ni. Khawvela court rang ber(quickest court in the world) leh man tlawm ber(cheapest court) chu consumer court a ni, an ti reng a ni.
Mizorama Consumer Commission kan neihte chuan mipui dinhmun hi an thlir reng tur a ni a. Intihlalna hmun a ni lova, intihropuina hmun a ni hek lo. Ni 90 chhungin tih hi an hre reng tur a ni. Helai hmuna ka lo awm ve tawh avang hian hetiang thu hi huai takin ka sawi ngam a ni.
Kan thupui pakhat hi i lo ngaithla leh lawk ang aw!
Tin, heti hi a ni a, Law Trends-in a tarlan danin Lucknow- I District Consumer Commission chuan Vishal Mega Mart chu an customer pakhat hnena Carry Bag man atana Rs. 18 an lak avangin Rs.25,000 a chawitir a. Commission Judgement tihchhuah atanga ni 45 ral hmâ ngeia pek tlak tur a ni.
Hetiang hian relief pek tur a ni.
1) Bag man – Rs. 18/-refund tur a ni.
2) 9% interest – Hun bi tuk chhunga a pek tlak loh chuan.
3) Compensation – Rs. 25,000/-
4) Consumer complaint Litigation charge Rs. 10,000/-
Duhâm vanga Rs. 18/- inlaksak man hi a to hle a nih hi! Hetianga customer rawn lo leh phalna la hmasa lova pawisa inlaksak hi dan bawhchhiatna, unfair trade practice leh deficient service a ni a. Consumer Protection Act 2019 huatthu sawina a ni.
Mizoramah hian Dawrkai lian thenkhatin carry bag man an customer- te an charge thin tih thu sawi a awm thin a. Hetiang hi, thil manah chhiar tel loh tur a ni. Tuna kan thil sawi mek hi mi tinin hria ila. Consumer leh thil zuartute hian kan ngaih pawimawh a ngai a ni. Lei leh hralh hi kan mize lanna pakhat a ni a, rinawm lo leh rinawm hriatna a ni. Kristian tha chu, heng hunah hian kan luang chhuak tur a ni e, kan ti a ni.