Zeng hri nia ngaih sample 9 thawn zingah a hri hmu rih lo
Zeng hri nia ngaih sample 9
thawn zingah a hri hmu rih lo
Kum kalta leh kum kal meka Lunglei district-a zeng hri ni theia ngaih sample endik zingah a hri hmuh chhuah a awm lo.
Lunglei District Task Force on Immunisation (DTFI) chu an chairman, bawrhsap Navneet Mann hoin an thukhawm a. An district-a 2025 April – June chhunga naupang leh raipuarte hnena natna hrileng inkaichhawn theih laka invenna (vaccine) pek dan dinhmun thlirhoin, tha leh hlawhtling zawka hri danna pek a nih theihnana rawtna an sawiho.
Report-a a lan danin, 2014 March 27 khan World Health Organisation (WHO) chuan India chu zenghri awm tawh lohna ram (polio free) ah a puang a. Hetihlai hian ram thenawmah zenghri hmuh a la nih reng avangin a danna pek hi kalpui chhunzawm zel a ni. Kum 2024- 2025 chhung khan Lunglei district atangin zenghri ni thei awma rinhlelh sample 6 chu phaia endik tura thawn niin, kumin April – August chhungin sample 3 thawn a ni a. Zenghri erawh hmuh a ni lo.
Kum 2025- 2026 chhunga Lunglei district-a Sub-District Hospital (SDH), Primary Health Centre (PHC) leh Main Centre (MC) kaltlanga hri danna pek turin raipuar 2108 tinzawn (target) niin, thla thum dan (quarterly) zelah raipuar 527 chu hri danna pek ngai anga chhut a ni. Kumin April-June chhung khan sakawr -ek- hrik (tetanus) leh hrawk na (diphtheria) hri danna, Td vaccine la kim raipuar 510 an awm a. Hemi chhung hian in lama nau nei 78 awmin, damdawi ina nau nei 457 an awm.
Lunglei district-ah kum 2025- 2026 chhunga SDH, PHC leh MC kaltlanga hri danna pek turin nausen 1846 tinzawn niin, thla thum danah nausen 461.5 zelin hri danna an lak ngai tura chhut a ni. Kumin April-June chhungin Penta-1 vaccine la nausen 457 leh MR-1 vaccine la nausen 386 awmin, nausen kum khat hnuailam hri danna la kim (fully immunised children) 393 an awm a. Hemi hun chhung hian Lungleia damdawi in pathum – Civil Hospital Lunglei, Christian Hospital Serkawn leh John Williams Hospital chuan an damdawi ina nau piang 331 hnenah BCG leh OPV vaccine pe in, nausen 298 chu Vitamin K an pe tih tarlan a ni.
Kumin October-a India rama district thlan bika zenghri danna (polio vaccine) pek runpui, Sub-National Immunisation Day (SNID) hman tur pawh sawiho a ni a. Mizorama SNID hmanna tur district pali zingah Lunglei pawh telin, October 14-ah SNID – hri danna pek runpui hi hman tur a ni. He huna zenghri danna pek tur hian Lunglei district-a naupang kum 5 hnuailam, 2020 October 14 hnulama piang 11001 tinzawn an ni.