Ziak leh chhiar thiam vek hi…

Centrally sponsored scheme ULLAS (Understanding of Lifelong Learning for All in Society) hmalakna hnuaiah Mizoram chu ziak leh chhiar thiam 98.2% awmna a nih tak avangin ziak leh chhiar thiam vekna state-ah puan theih a ni ta a; May ni 20 khan chief minister Pu Lalduhoma chuan a puang a nih kha. India ramah a hmasa ber kan ni ta.
State dang zingah chuan Kerala leh Lakshadweep bakah Goa leh Tripura te hi a sang filawr deuh an ni a, han ang deuh se chuan ULLAS tehfung 95% chung lam hi an thleng ve thei thuaiin a rinawm.
Ziak leh chhiar thiam tam ber nihna hi a lawmawm rualin, chief minister-in a sawi ang hian, ziak leh chhiar thiam tamna state ni mai lova mithiam tamna state ni tura anlak hi a pawimawh zawk chu a ni awm e.
Ziak leh chhiar tamna state ni bawk, mithiam tamna state ni bawk kan sawi dawn chuan, Kerala state hi India rama hmahruaitu a ni mai awm e. Kerala sawrkarin a report dan chuan, Keralites te hi khawvel ram 195 zinga ram 182-ah hnathawkin an inzar pharh a, an zingah hian mithiam (educated) an tam hle a ni.
Kerala state kan han thur chhuah chhan pawh, India rama ziak leh chhiar thiam tamna ber an nih hin vang a ni a. Ziak leh chhiar thiam an tam a ni satliah mai lova, mithiam pawh an tam a, heng mithiamten ram danga an thawh chhuah pawisa an chhungte an rawn thawn hi Kerala state economy chawm thautu pawimawh tak a ni pha a ni.
Tichuan, Mizoram kan han en ve ta a, ziak leh chhiar tamna state, India ram state zinga top 3-ah kan awm deuh reng a, mahse ram danga hnathawk thawn chhuah chu sawi loh, kan mithiamte zingah state pawna hnathawka chhuak an tam lo hle. State pawn lama hna zawng tur leh thawk turin ram hruaitute pawhin fuihna thu an sawi chamchi, mahse, chutiang chu kan vang pharh reng mai a nih hi.
Ziak leh chhiar thiam tamna ni bawk, mithiam tamna ni bawk ni kawp ve tur hian a eng lai aanga hma han lak tur nge ni ta ang? tih hi zawhna pawimawh tak a ni a. Kum tin halai graduate, post graduate a sang tel chhuak ruih ruih rengte hian engatinge state pawn lamah hna an thawh ve loh? tih pawh hi kan inzawh fo a pawimawh awm a