Ziak leh chhiar thiam vekna state hmasa berah Mizoram

A awmchhun leh a hmasa ber ni turin Mizoram chu state khata cheng zingah ziak leh chhiar thiam vek awmnaa puan a ni. Sawrkar laipui Ministry of Education-a Understanding Lifelong Learning for All in Society (ULLAS) hnuaia ziak leh chhiar thiam vekna state ni tur hian, state chhung mipui awm zat atanga teha ziak leh chhiar thiam zat chu zaa 95 aia tam nih a ngai a, he tehfung atang hian Mizorama ziak leh chhiar thiam zat hi, Periodic Labour Force Survey (PLFS 2023- 2024) ah zaa 98.2 a ni.
Tun hnaia ULLAS hmalaknaa ziak leh chhiar thiam lo zat zawn chhuahnaah, ziak leh chhiar thiam lo chu tlemte an nih tawh avangin ULLAS tehfung atangin Mizoram chu ziak leh chhiar thiam vekna state tia puan theih a ni
A puanna leh lawmna hi Thawhlehni khan Mizoram University Tanhril hmunah neih a ni a. Chief minister Lalduhoma chuan Mizoram chanchina hriatreng tawh tur a ni, tiin, he dinhmun thlen theihna tura thawktute zawng zawng chungah lawmthu a sawi.
“Mi pahnih khat thawhrimna zara he dinhmun hi thleng kan ni loa, ram hmangaihtu, rim raka thawk mi tam tak zara thleng kan ni. An zinga pawimawh ber chu, ziak leh chhiar thiam nih duh a, kum upat hnu pawha la zir leh hram hram mi 1692 an ni a. Tuna zir leh kher tul ti rih lo, kan thian dangte pawh kan hrereng a, an rawn zir duh hun nghakhlel takin kan thlir a ni,” a ti.
He hun hmanpuitu Union minister of state for Education Jayant Chaudhary chuan hun rei tak chhung India rama tih theih loh anga ngaih, ‘fully literate state’ ti thei hmasa ber a ni chu Mizoram a lawmpui tih a sawi a. He hun thleng thei tur hian ram hruaitu tha, hnathawktu tha leh khua leh tui tha neih a ngai tih a sawi.
Education minister Dr Vanlalthlana pawhin Education department leh a thawhpui institution ho thawhrim rah bakah tlawmngai pawl leh kohhran-ten an thawh hle tih a sawi a ni.
Ziak leh chhiar thiam vekna tura zinkawng:
8 Ziak leh chhiar thiam vekna state ni tur hian School Education department-a Samagra Shiksha enkawl, ULLAS hnuaiah Nav Bharat Saksharta Karyakram (New India Literacy programme) tihhlawhtlin hna thawh a ni.
8 Sawrkar chuan State Project Office Samagra Shiksha Mizoram chu he programme tihlawhtling tura thawktuah a ruat a. State Literacy Mission Authority tanpuitu atan State Centre for Literacy din niin, SCERT kuta dah a ni.
8 SCERT hian Mizo tawngin zirtirhbu a siam a, a hmingah ‘Vartian’ tih a ni. Lawngtlai district-a zirlaite tan English version siam a ni bawk. Zirlaite tana zirtirhbu lak tawi ‘Romei’ tih leh, volunteer teachers tana kaihhruaina bu siam a ni
8 Cluster Resource Centre coordinator (CRCC) te chu New India Literacy Programme surveyor atan hman an ni a. Survey neihna hmuna in tinah lutin ziak leh chhiar thiam lo dap chhuah hna an thawk.
8 Survey-ah hian kum 15 leh a chunglam ziak leh chhiar thiam lo mi 3026 an awm tih hriat a ni a, chu’ng zinga 1692 chu zir thei dinhmuna ding, zir duh an ni tih hriat a ni. Samagra Shiksha hnuaia District Project Office-ten volunteer teacher tur an zawng a, mi 292 an inpe.
8 Ziak leh chhiar thiam lo awmna hmunah hian theih ang angin zirtirna class neih a ni a. School, community hall, YMA library leh hmun remchang dang hman a ni. Zirlai tlemna hmunah chuan volunteer teacher-ten an inah an zirtir.
8 Ziak leh chhiar thiam lo zingah thiam belh an lo awm tak avang hian, Mizorama ziak leh chhiar thiam zat chu zaa 98.2 a ni a. ULLAS tehfung atangin ziak leh chhiar thiam vekna state-a puan theih hmasa ber a ni ta a ni.