Zirlaite hnenah lawmman hlan

State Level Veer Gatha titha zirlai mi 8 hnenah School Education department chuan Zirtapwni khan Aizawlah lawmman a hlan.
School Education director Lalsangliana sawi danin, ‘Veer Gatha’ hi ram chhunga mi huaisen chawimawina dawng tawhte ngaihhlut an nih theih nan leh zirlai naupangte pawhin ram leh hnam hmangaihna thinlung an put theih nan intihsiakna hrang hrang – thawnthu inphuahsiak, paragraph writing, poem, lemziak, multi-media presentation hmanga sikul inel a ni.
Intihsiakna hi District Level Evaluation Committee-in district nodal officer – DEO-te kaihhruaia endikin, an thlanchhuah chu State Level Evaluation Committee-in School Education director kaihhruaiin a endik leh a, State Level Veer Gatha lawmman dawng tur hi thlanchhuah a ni. Mizoramin national level-a nomination a neih theih zat mi 40 rawta thawn a ni a; kan vawikhat telna a nih avangin National Level Veer Gatha lawmman dawng an awm rih lo a ni.
Veer Gatha State Level lawmman hi Veer Gatha state project director, School Education secretary Dr Lalzirmawia Chhangte chuan hmanpuiin, lawmman dawngtute hnenah certificate leh sumfai Rs. 8000 theuh a hlan.