Zirtirtu pali chawimawi

Serchhip bawrhsap kaihhruai District Level Committee for Celebration of Teachers’ Day 2024-in a rel tawh angin Serchhip district-a zirtirtu thawk tha pali thlanchhuah hnenah Ningani khan chawimawina – ‘Serchhip District Special Teacher’s Award’ hlan a ni.
Award hi chi li – primary school, middle school, high school leh higher secondary school level-a then niin, award dawng turin category tinah mi pakhat zel thlan an ni.
Primary school-ah Govt. Chhingchhip P/S-I headmaster K Lalthazuali; middle school-ah Govt. Gospel Centenary M/S Chhipphir headmaster C Zohmingliana; high school-ah Hrangturzo H/S N Vanlaiphai headmaster Remkunga, higher secondary-ah Govt. Higher Secondary School Serchhip lecturer RK Sanghmingliana thlan an ni a. Certificate leh Rs. 2000 hlan an ni.
September 5 – Zirtirtute Ni chu Serchhip district-ah hian school zawng zawngin anmahni school theuhah an remchan dan angin an hmang a ni.