Zirtirtute hnenah lawmthu ka sawi – Education minister
Zirtirtute Ni a lo thlenin zirtirtute hnenah lawmthu a sawi tih School Education minister chuan a sawi a. Ram leh hnam hmasawnna leh changkanna kawng min zawhtirtu an nih avangin chawimawi an phu a, chawimawi zel turin mitin a sawm.
September 5 – Zirtirtute Ni pualin School Education minister Dr Vanlalthlana chuan thuchah a siam a. Zirna ngaisang em emtu India President pahnihna, Dr Sarvapalli Radha Krishnan piancham denchhenin kum 1962 atang khan hman tan a ni a, kumin hi vawi 63-na a ni tih a sawi. Zirtirtu hna chu a pawimawh em em a, zirlaite kawng kawhhmuh a, nun kawng dik zirtirna hna ropui a nih avangin sawrkarin an pualin ni bik a siam hial tih a sawi a ni.
Zirna hmanga mihring hman tlak leh mi puitling chher chhuak tur hian sawrkarin theihtawp chhuahin sum leh pai pawh seng thin mah se, zirtirtute inpekna tel lo chuan a hlawhtling thei thin lo tih sawiin, “Vantlang mipui leh ram hmasawnna leh changkanna hi zirnaah a innghat a; chumi hnukpui ber leh innghahna laimu chu zirtirtute an ni. Zirtirtute Ni a lo thlen hian zirtirtute hnenah lawmthu ka sawi a, anmahni kan ngaisangin kan chhuang a ni,” a ti.
Zirtirtute Ni pual hian zirtirtu, natna khirhkhan tuarte tanpuina tur – National Foundation for Teachers Welfare (NFTW) fund, zirtirtu zawng zawngten an thawhkhawm thin a. He fund atan hian zirtirtuten kum khat atan Rs.200 an thawh thin tih minister hian a sawi a. NFTW Fund atanga tanpuina pek hian inthliarhranna awm loin, sawrkar school leh private school-a thawk zirtirtu a huam vek tih a sawi
“Zirtirtute hi zirlaite tan chuan kawng hrang hranga thiamna petu an nih avangin, zirlaiten zirtirtute nungchang an entawn a, an la chhawng mai zel a; chuvangin, thalai leh zirlaite ruihtheih thil laka an fihlim theih nan, zirtirtute ruihtheih thil laka fihlim turin ka chah a. Zirtirtu hna hi hna thianghlim a nih avangin, zirlaite bakah mipui vantlang tan pawha entawntlak leh mi rinawm ni turin ka ngen a ni,” a ti.
Education minister sawi dang:
* National Foundation for Teachers Welfare (NFTW) fund kuminah zirtirtu 157 hnenah Rs. 30,40,000 tanpuina pek a ni.
* Tanpuina pek dan hi category thumah thenin, Mizoram damdawi ina inenkawl hnenah Rs. 20000, state pawn damdawi ina inenkawl hnenah Rs. 30000 leh state chhunga general illness avanga hospital-a admit-te tan Rs. 10000 pek thin a ni.
* Mizoram sawrkarin zirtirtu tha leh chawimawi tlakte hnenah ‘State Award’ a hlan thin a; kuminah zirtirtu 4 – RC Lalruatchhunga (Govt. Zemabawk HSS), Zothanliana (Govt. Chaltlang HS), C Lalhrilliana (Govt. Champhai Vengthlang MS) leh T Lalramnghaka (Govt. Selchhunga PS) hnenah pek an ni.
* Kumina National Award to Teachers dawng thei tura mi pathum rawt zingah Joseph Vanlalhruaia Sailo (Synod HSS) thlan a ni.
* Mizoram sawrkarin zirna tihhmasawn nan theihtawp a chhuah a. Zirtirtu indaih lohna phuhhruk nan kumin January khan casual teacher 1370 (350 H/S + 371 M/S + 649 P/S) a la a. Office staff (UDC) 10 a la bawk.
* School Education department Adult Education hnuaiah mi 137-in eizawnna nghelnget din nan training an zo a. Tunhnaiah school 113 siamthat leh siam thar a ni a, la chhunzawm zel a ni.
* Pre-school naupangte tan Mid-Day meal telh thar a ni a, kum 2023- 2024 chhungin he scheme hi school 2499-ah hman a ni.