ZMC chhuak hmasa berte thlah

Mizorama MBBS zirna awmchhun, Zoram Medical College atanga zirchhuak hmasa ber, kum 2018 batch zirlai 95-te Graduation Day chu Zirtawpni khan ZMC hmun Falkawnah hman a ni.
2018 August-a Zoram Medical College hawn a nih atanga batch hmasa ber, kum 2018-a bul tan MBBS zirlai graduate lawmna hi Health & Family Welfare principal secretary Esther Lalruatkimi chuan hmanpuiin, zirlai graduate tharte chu zirchhuak tawh mah se, an zir chhuah lantir theih nan bul an tan dawn chauh, tiin, kum lo la awm zel turah leh hna an thawhna hmunah hmasawn tum zel turin a chah. Doctor tam tak, zir hunlaia ti tha si, a hnua an hnathawh kawnga tha si lo leh ruihtheih thilin a tihbuai tak an awm tih a sawi a ni.
ZMC puitlinna kawngah harsatna hrang hrang an tawk tih a, miin an ring tawk lo thin tih sawiin, hetiang karah theihtawpin hma an la a, khatih hunlaia minister-te nen nasa takin sawrkar laipuiah college puitling din a nih theih nan hma an la tih a sawi.
ZMC hi batch khatah mi 100 zir theihna tura ruahman niin, an zir lai mekin vanduaithlak takin mi pahnihin nunna an chan a, mi pakhat hnawhchhuah a ni. Mi 97 atang hian 95 an pass a, an zinga 68 hian internship an zo fel tawh. An zingah hian hmeichhia 57 awmin mipa 38 an ni. Mizoram atangin zirlai 72 an awm a, All India quota atangin zirlai 10, non resident Indian quota atangin zirlai 13 an awm.
Tun dinhmunah ZMC-ah hian course chi hrang hrang zir theih 22 a awm a ni.