ZMC tana special package MP thlan hmaa hmuh beisei

Zoram Medical College than zelna atana mamawh dinna tur sawrkar laipuiin ‘special package’ pek a tiam chu Lok Sabha MP inthlan hun puan hma ngeia a hmahruai hmuh hman an inbeisei tih chief minister Lalduhoma chuan a sawi.
Thawhtannia Zoram Medical College Faculty & Doctors Association (ZFDA) hruaituten an hmuhnaah chief minister chuan, ZMC-in National Medical Commission endikna a paltlang theih nana hma a lak dan tlangpui a lo hrilh a. Tun leh tuna mamawh nghal thil lei nan state sawrkarin cheng vaibelchhe 1.2 a pe tawh a, a bak mamawh dang leina leh thawhna tur pawh sawrkar laipuiin a phalsak angin, fund an dil a, MP election model code of conduct an puan hma ngeia a hmahruai an rawn pek hman an beisei tih a sawi.
National Medical Commission tehna thil tam tak chu Mizoram angah a tlin ve theih loh thu pawh a thlen a, ngaihhnathiamna pe turin a ngen a, an tihsak an beisei tih a sawi bawk.
ZFDA hruaitute hian chief minister hi lawmpuina an hlan a. ZMC hmasawnna tur a ngaihpawimawh avangin Delhi thlenga an mamawh a sawisak chu an lawm hle tih an hrilh. An thil thlen dang pawh uluk taka a lo zirchian tur thu chief minister hian a sawi a. ZFDA hian CM Relief Fund atan cheng sing li an hlan a ni.