ZMC&H tih changtlun belhnaHealth minister-in a hmunah en

ZMC&H tih changtlun belhna
Health minister-in a hmunah en
Zoram Medical College & Hospital (ZMC&H) Falkawn chu tunhnaiah tih changtlun belh nual a ni a. Nilaini khan Health & Family Welfare minister Lalrinpuii chuan a hmunah a enpui.
ZMC&H-a thawktu hrang hrang tlawhkualin an harsatna leh mamawh an sawi a ngaihthlak sak a, sawkar chuan thawktute leh mipui tan theihtawp a chhuah zel dawn tih a sawi.
Mizoram Universal Health Care Scheme kalpui hnua ZMC&H tih changtlunna atana Health department hmalakna zingah khum 26 awmna chu a hma thei ang bera hman tan nghal nise tih Health minister hian a sawi a. Khum 10 awmna Gynaecology Ward hmang tan nghal turin a ti.
Cabin 10 awm thinah MUHCS kalpui a nih hnuin cabin 10 dang hawn a ni a, cabin 10 hawn belh leh niin, cabin 10 bawk (a vaiin 40) hawn leh thuai tura ruahman a ni. 26 awm thinna Orthopaedic Ward-ah khum 30 dah belh a ni.
Nausen pianghlim enkawlna, Neonatal Intensive Care Unit (NICU) pahnih hawn a ni a, a hmaa awm tawh sa nen tunah NICU hi 8 a awm a ni. Pediatric Intensive Care Unit (PICU) tuna awm mek 3 bakah pakhat dang dah belh tura hma lak mek a ni.
Integrated Care Unit (ICU) awm tawh sa 13 bakah 13 dang hawn thar a ni dawn a, khawl remkhawm hna buaipui mek a ni a. Operation theatre 5 – gynaecology (2), cardiology (1), neurology (1), general (1) hawn thar tum a ni a, tunah OT hi panga 5 hman theihin a awm. Cardiology Ward thar, khum 6 awmna hawn theih tura hma lak mek a ni bawk.
Thawktu indaih lohna phuhru turin MUHCS multi-task worker 20 leh casual nurse 64 lak thar an ni a. Heng bakah hian junior resident (JR) lakna tur buaipui mek a ni. MCH neurosurgery (super specialist) Dr Zothansanga Zadeng chuan a zirlai zirzoin, ZMC&H a zawm leh tawh a ni.