Zo hnahthlakte ralmuang rih

Meitei nena indo, Manipur-a Zo hnahthlakte an ralmuang rih a, inkah leh intihbuai a awm rih loh avangin ni tin khawsak pawh a pangngai rih tih thu dawn a ni. May ni 3 kha Zo hnahthlakte leh Meitei intihbuai kum khat tlin champha a ni a, hemi ni hian Manipur-ah Zo hnahthlakte leh Meitei te’n hun an hmang ve ve. Hnam hnihte’n a hrangin hun an hmang a, mahse tharum thawhna lam a thlen lo.
Zo hnahthlakte’n mahni hmun theuhvah hun an hmang a, biak ina an tawngtai rual bakah mahni in theuhvah flag dum an zar bawk. A huhovin mipuiin hun an hmang bawk a, mipui pungkhawm pawh khaw hrang hrangah an thahnem tih thu dawn a ni.
Manipur-a Zo hnahthlak pawl hrang hrangte intelkhawmna Zo United-in hmun hrang hranga Zo hnahthlakte hi May ni 3-a hun hmang tur hian an ngen a, Zo hnahthlak pawl hrang hrangte’n hei hi an bawhzui a ni.
“Khaw hrang hrangah mipuiin tih tak zetin hun kan hmang a, mipui pungkhawm pawh kan tha a, rilru leh tih tak zetin hun kan hmang,” tiin Zo United hruaitu pakhat chuan The Aizawl Post a hrilh a, “Kan rilru a khawih a, kan rilru a tithar a, ram leh hnam tana tang turin rilru kan siam thar a,” a ti bawk.
Zo hnahthlakte hian ‘Kuki-Zo Awakening Day’ tiin he ni hi an hmang a, Meitei lamin inpumkhatna ni atan an hmang bawk.
Manipur atanga thu dawn danin, April thla tawpah khan Kangpokpi velah Zo hnahthlakte leh Meitei hi an inkap a, chumi hnuah chuan inkah a awm rih lo.
Zo hnahthlak lamin an chhinchhiah danin, he buainaah hian Zo hnahthlak lam hi mi 180 velin nunna an chan tawh a, mi 176-te ruang chu hmuh tawh niin, mi pali panga vel ruang hmuh loh a la awm.
Zo hnahthlak lam hian Manipur hi President’s Rule hnuaiah a awm mai thei niin an hria a, President’s Rule hi a awm ang tih an hlau. Sipaiin thu an nei ang a, hnam movement-in a tuar ang tih an hlau a ni.