Zo hnahthlakte’n Mizoram belh tum

Buaina kara awm mek Manipur-a Zo hnahthlakte’n an hmakhua atan Mizoram belh zel an tum a, Manipur hnuaia awm an duh loh thu an sawi nawn bawk.
Churachandpur district-a Zo hnahthlakte intelkhawmna Indigenous Tribal Leaders Forum (ITLF)-in January ni 27 khan mipui inrawnkhawmna hun an huaihawt a, an hmakhua atan Mizoram belh hi an rel a ni.
“Kan biak inte leh bungruate tichhiaa kan nunna latu sorkar hnuaiah kan awm thei lo…” an ti a, Manipur sorkar chu Zo hnahthlakte thendarhtuah puhin firfiak pawl Arambai Tenggol hnuaia intiamah puhin, “Sorkar laipuiin Delhi atangin min enkawl rawh se,” an ti.
A tul dan azira lungawi lohna lantir zel an rel a, ITLF thiltumte thlawp zel an rel.
Manipur-a ralthuam leka che, inkahhai puang mekte chu Manipur inpumkhatna tur lam thlawp lo tur leh ITLF te’n UT an ngiatna thlawp turin an ti a, Zo United bultumin anni hi Zo hnahthlak MLA-te nen inbia se an ti bawk.
India sorkarin India leh Myanmar inkar border fencing tih a tum leh India leh Myanmar-a ramri hnaiha mite inkalpawh theihna free movement regime tihtawp tumna an pawm loh thu an sawi bawk.
“Kan MLA-te hi kan nunna latu leh firfiak pawl Arambai Tenggol hnuaia thu tiamtu Meitei sorkarah an tel tur a ni lo,” an ti a, Manipur chief minister Biren Singh-a sorkarin Zo hnahthlakte dodal zawnga hma a lakna dodal tura tiin, “A tul a nih chuan an bang tur a ni,” an ti.
ITLF hian Lamka khawpuia Evangilical Baptist Convention Centenary Hall-ah mipui inrawnkhawmna hun hi an huaihawt a, pawl hruaitu bik ni lovin mipui a duh apiang an kalkhawm a ni.