Zo hnahthlakte’n NOTA vote tum

Lok Sabha MP inthlan lo awm turah Manipur-a Zo hnahthlakte chuan candidate-te vote lova NOTA vote an tum a, chumi tur chuan an inbuatsaih mek.
Manipur-ah hian Zo hnahthlakte leh Meitei an indo a, Manipur sorkar chu Zo hnahthlakte dotuah ngaih a ni. An chunga thil thlengah an lungawi loh avangin Zo hnahthlakte hian inthlanah NOTA vote an tum a ni.
Manipur hian Lok Sabha-ah seat hnih an nei a, inner Manipur leh outer Manipur an ti. Inner Manipur hi Meitei hlang an ni a, outer Manipur hi Scheduled Tribe-te awmna niin, Zo hnahthlakte leh Naga an ni. Outer Manipur-ah hian Meitei voter engemaw zat an awm ve bawk.
Outer Manipur bialah hian Scheduled Tribe-te chauh an ding thei a, tun tum inthlan lo awm turah hian Zo hnahthlak ding an awm lo. Hming pekluh hun a tawp tawh a, Naga hlir pali an ding dawn.
Thu dawn danin, Zo hnahthlak lam hian a tirah chuan candidate neih loh mai ni lovin inthlan hi boycott an tum a, mahse vote thlak loh hi mi dikna chanvo (right) palzutsakna a ang thei ang tih hlauvin, vote thlak a, NOTA vote an tum ta zawk a ni.
“NOTA vote vak ila, NOTA-ah vote a tlak tam chuan khawvelin mak a ti ang a, kan issue puanzarna remchang te pawh a ni thei,” tiin Zo hnahthlak hruaitu pakhat chuan The Aizawl Post a hrilh.
Outer Manipur bialah hian Zo hnahthlak leh Naga an ding a, he biala cheng Meitei-te hawi lam a pawimawh thin. Tuna an MP ding lai hi Naga a ni a, chumi hma chiah chuan Zo hnahthlak lam an tling thung; 2009 atanga 2019 thleng khan Thangso Baite chu term hnih a MP a ni.
Naga lam pawh hian Naga buaina chungchang chinfel phuta boycott chang an nei a, Zo hnahthlak tan tlinna remchang a awm thin. Tun tum inthlanah erawh Naga an tling dawn tih a chiang.