ZORAM THAR LEH ZU RUIH

Rev. Dr. Zaichhâwna Hlâwndo
Kar hnih a zâwnin Zu chungchang kan sawi tawh a, thenkhat tan chuan a ninawm lamah pawh a kal lek lek ang. Amaherawhchu hei hi kan ram leh hnam hmelma a nih tlat avangin Zu hi Zofate hian fakmawi chu sawiloh a huata kan huat bur a ngai tih hi ka mimal thlir dan chu a ni. Chuvang chuan he setana tuibur rimchhe lutuk leh Zofate min suattu, chhungkua, khawtlâng leh ram leh hnam min eichhetu hi engti kawng zawng maha sawimawi emaw thlah zalen emaw hi kan thatpuina tur ka hmu ve tlat lo a ni. Tun tumah chuan Zoram Thar leh Zui Ruih tih hi ngun taka kan ngaihtuah a, kan zirho turin ka rawn ziak dawn a ni.
A hmasa berin Zoram Thar chu Lal Isua Krista lalna tur Sawrkâr, ram rorêlna thar lo piang tur a ni dawn a, ram thianghlim leh ruitheihthil kha chu a inhmeh dawn lo a ni. 1 Thessalonika 5:23 ah chuan, ‘Tin, remna Pathian ngei chuan in pumin tithianghlim che u rawh se; tin, in thlarau leh, in rilru leh in taksa chu kan Lalpa Isua Krista lo kal hunah chuan, sawisêl bovin a puma humhimin awm rawh se, tih kan hmu. Kan thalrau rilru leh taksa a puma a thianghlim dawn chuan Zu chuan hmun a chan a rem dawn lo tihna a ni.
Kohhran leh NGO pawl hrang hrange pawhin Zu kan do dan leh tih rem kan tum dan koki kan thlak a hun hlein ka hria. A zu ngawr ngawr ringawt buaipui lovin Zu Ruih hi na taka kan khap a ngai. Ram hmasawn zawka kan ngaih kan sawi fo, an ni chuan zu in an thiam kan tihte hi zu in an thiam vang nilovin zui ruih hi na taka an khap avangin puipunnaa Zu avanga buaina te leh zu ruih avanga thihna te pawh a tlem phah zawk a ni. America ah kum 3 vel ka awm ve a, England-ah kum 11 dawn ka awm. Heng ram ropui leh changkang kan tihah hian Zu an in nasa hle a, mahse zu rui hmuh tur chu an tam lo hle thung. A chhan enge kan tih chuan Zu rui chunga motor khalh te an khap tlat a, Motor an khalh dawn chuan Zu an in a nih pawhin ruihna khawp an in ngam lo. Motor accident a awma police ten an endik hmasak berte zinga mi chu Zu a rui em? tih hi a ni. Zu rui chunga Motor khalh chuan thiam a chan theih loh tluk a ni.
Kan ramah Zu hi kum tam tak kan do tawh a, mahse a rem hleih theih lohna chhan chu Zu ruih kan khap tel loh vang a ni. Zofa zu in reng reng hian an in chhan chu ruih an duh vang ti ila kan sawi sual tamin ka ring lo. Ruih loh chuan Zu in khan awmzia a nei lo niin kan ngai tlangpui. Kohhranin Zu kan duh lo tih hriain Biak Inah zurui chunga luh tum chu kan vang khawp mai. YMA Mizorama pawl lian ber pawhin Zu na takin kan do a, mahse YMA chetvelna ti hreawm bertute chu Zu rui an ni. Zu kha kan do va, mahse Zu ruite chu zalen takin kan taltir a ni ber mai. Chuvang chuan YMA hian khauh takin Zu Ruih hi khap sela, Zu in duh leh in peih kan tlem pharh mai ang. Mitthi lumennaah te, khawhar lenpuinaah te, thlan laihnaah te leh YMA punkhawmnaah Zu rui tel phal a ni lo ti ila, tunge zu in reng peih ang tih hi ka thlir dan a ni. Tuna kan awm danah hi chuan Zu in mite tan chuan a zalen em em a, Zu kan khap a, a zu leh a zuartute kan man a, Zu in leh rui kan man leh chuang si lo.
Vantlang puipunnaah te party politics campaign-naah te chuan a lang sar ber ber chu Zu rui ho an ni. Chuvang chuan Zu kan duh loh leh huat êm êm hi amah mai hian a sual a ni lo, a hmangtuten kan hman sual avanga thawk thei chauh a ni. Kan ramah hian Zu zawrh te chu thil zahthlak takah kan ngai a, Zu zuarte chu khaw chhung atanga endawng leh hnawhchhuah te pawh an awm. Amaherawhchu Zu ruih avanga khawtlangin a endawng emaw, hnawh chhuah emaw chu an awm rih lo a nih hmel. Kohhran pawhin Zu zuarte sum pawh kan duh vak loh laiin Zu ruih chingte thawhlawm thawhte chu kan lo dawng hreh lem lo te pawh niin a lang. A rui deuh reng a, mahse thawhlawm chu a thawh tha khawp asin kan lo tihte pawh an lo awm palh maithei asin.
Zoram Thar –Pathian Lal Ram Sawrkar a lo pian hunah chuan sual leh ramhuaite pawh an tlawm tawh ang. Zu in duh pawh kan awm tawh mang lo ang, a ruih lek phei chu thil zahthlak tawpah kan ngai tawh ang. Hnam thianghlim, hnam ropui khawvel tana eng turte kan harh tawh ang. Ram rorelna thutthlenga thute chu Lalpa hriakthih leh a Chhiahhlawhte an nih tawh dawn avangin Sawrkar ni pawimawh leh in hmuhkhawmah a senchi (Zu manto) lam duh leh in duh ang kha an ni ve lo ang. Engkim kan tih apiangah Lal ber Lal Isua Krista tan kan tih tawh dawn avangin he ram leh hnamah hian Lal Isua Krista Chanchintha chu thiltihin kan lantir tawh dawn a ni. Chu hun lo thlen famkim hun tur chu dingdihlipin kan thlir mek a ni. Kum tam tak au hla a kan hman – Kan mimal nunah, chhungkuaah, khawtlangah, kan ramah LAL ISUA KRISTA CHAUH–LAL BER RAWH SE kan tih kha a taka a lo thlen zel theih a, Zoram Thar Sawrkar a pian thuai theih nan Zofate i inbuatsaih zel ang u.