Zorama mi huaisen ber – Ruihhlo Ngaite !

Lalremliana Pachuau
Mahni nihna dik tak kan pindan lairila hnutchhiaha, hmaithingháwng vuah chunga khawlaiah leh mi hmuh tura lem kan chan suau suauna Zoram, Kristian State-ah hian mahni nihna ang anga lang chhuak ngam awmchhun chu, ruihhlo ngaite chiah hi zuk nia! He thu dikah hian Zoram kohhran buaina, siam thar a nihna tura harsatna chu phumin a awm nghal zat bawk.
Zoramah hian ngawl veina hrang hrang salah, chhûng tin kan tang thup a. thenkhatin hur ngawl an vei a, thenkhatin ei rûk ngawl an vei bawk. |henkhat thung chu duhamna ngawl vei nghet tlat, thenkhat erawh thluaka sum lut natna ngawl vei, thenkhat mi rêl ngawl vei tlatte kan ni nuaih mai! Ngawl veina hrang hrangin a luhkhung ni hlawm mah ila, mi duham camping, kawrapsawn camping, sex addiction camping siam ngam awm ta thut se, camp lut tur reng an awm lo ang!
Mahse, ruihhlo ngai pual camping an han buatsaih ta a. |halai rual, a sang telin an lut ruih ruih zel mai a nih hi. Ruihhlo ngaite chiah hi mahni nihna dik tak pawm ngam, mahni nihna zahpui hauh lo, hmaikâwr hmanga inthup bo tum ve lo mi huaisen an ni tlat a ni. Kohhranin thahnemngai takin kum tin, mahni tualchhûnga camping a huaihawtahte hian, a kum telin lut kan tlem tial tial a.
Kan ngawl veina hrang hrang lak atanga chhuah zalen duh tumah kan awm lo emaw tih mai tur a ni zo ta. Chu mi rah chhiatzia hi kan thlir ngam a va hun ta êm! Kohhranin dam kan duh, mahse kan natna, kan nihna sual tarlang ngama siam tharna chan tum ai chuan, kohhran camping chu mi sual nia kan ngaih ruihhlo ngaite bawkah kan pem buh bel zel a. Anni chauh hian a ni, an nihna zep lova pawm ngam ni!
Kum tam tak chhûng mi sual tia kan chirhtheh ruihhlo ngaite testimony ringin, kohhranin harhna chan a lo tum tawh a, a la hlawhchham tluang zel rih a. Vawi khat tê mah ei rûk chîng testimony ngaihthlak tur kohhranin kan la nei ngai lo a. Thluaka sum lut ngawl vei dam leh pawh an awm ngai bawk hek lo. Heng mite testimony hi kohhran siam thar lehna tura kan mamawh tlan a ni lawi si!
Chu ai chuan Zu chu sual tinreng bulah chhuahin, ruihhlo ngaite chu rukrûk hmang ber, dawt sawi thiam berah kan chhuah fel der a. Pisa leh sumdawnna hmunpuia dawt sawi chîng, mipui chanai ei rûkhmangte erawh an kel e awl der thung. Sual tinreng bul tangka sum ngainat chu, duat takin tanglaiah kan kuah bet ngawih ngawih a. Kheh puam, chiah puam, kuhva rah ro leh damdawi tawlhrûka inhnamhnawihte erawh, a rûka hur hmangte nen an hmaikâwr phenah mi dawihzep an nihna angin an la biru tluang ta zel a nih hi.
Lemchanna khawvelah hian ngawl vei dang zawngte khian, khawtlâng leh kohhran hi an ngawl vei thup nân an hmang thiam êm êm a. An ngawl veina lak atanga dam duh tak tak an vâng pharh mai. Sualnate tihpuna a awm tur thu hrilh lâwkna lehkhabu ringtu kan nih avangin, kan rama sualna pun nasatzia leh inlar nasatzia kan hmuin kan hre mek a. Ualau taka kan hmeichhiate, Social Media hrang hranga an inzawrh ngam tawhna ramah kan chang mek a nih hi.
Sum bawiah chhûng tin kan tang emaw tih mai tur niin, mipat hmeichhiatna hman khawloh mai a ni tawh lo, mawngkaw hurna sual nasa takin a pung a. Kan ramah hian Hremhmuna sualna awm zawng zawngte, kan tuallaiah an rawn insuan ta emaw tih mai tur a ni zo ta.
Mahse, heng sualah hian ka tang a, chhanchhuah ka ngai tia damna pan ngam erawh ruihhlo ngaite bak an awm si lo. Lal Isua ngeiin, “Chhiah khawntute leh nawhchi zuarte chuan Pathian ram an luh khalh dâwn che u” tia a lo sawi tawh kha, a dikna kan ramah kan hmu ta a lo ni.