ZPM-a inthlahrung lo turin hnamdang chah

Mizorama cheng Bru, Chakma leh Gorkhali te tan Zoram People’s Movement party-ah inthlahrung lo tel theih a ni tih an party vice president Lalthansanga chuan a sawi.
Nilainia an party office-a inkhawmah Lalthansanga chuan, ZPM chu Mizoram leh Zofate chenna rama awm zawng zawng huapzo party a ni a. He rama cheng Bru, Chakma leh Gorkhali te tan pawh inthlahrung loa tel theihna party a ni, tiin, “Pangpar huanah pangpar chi hrang hrang mawi taka an par ho thin angin, he ramah hian hnamdangte nen rualkhai taka hma sawnin, lungrual takin kan cheng ho thei a ni,” a ti.