ZPM-in criminal complaint siam tum

MAMCO sum tihchingpennaa hming lang vea puhna chungchangah ZPM chuan an candidate Richard Vanlalhmangaiha chu dawta puh tel a ni, tiin, he thil thehdarhtute hrem an nih theih nan criminal complaint an thehlut dawn tih an sawi.
ZPM Legal Department general secretary Vanlalsiama Pachuau chuan, kum 2011 leh 2012 vela MAMCO deputy manager (Marketing) Lalremthanga leh MAMCO consultant nia chhal Mustaqur Rahman, Guwahati ten contract hna pek chungchanga inbumna case chinfel tawh, hremna pawh pek tawh kaihhnawihah ZPM MP candidate sawi luh ve talh tumna ‘David Sailo’ inti thuziah chu social media-ah thehdarh a ni a. Hemi thu ah vek hian Tuesday Nightmare Youtube channel chuan tute emaw phone-a bia in, an inbiakna record chu thehdarh a nih bakah rinthu tlem belhchhahin, case la kal mek anga sawi zuiin a thehdarh leh bawk tih a sawi.
He case-a Richard Vanlalhmangaiha (Richie-a) social media leh Youtuber pakhatin hmel tel hram an tum chhan an sawi langsar berah affidavit-ah hming a sign ve tih a nih thu sawiin, “MAMCO lam intiamkamna lehkha kha kan chhiar a nih chuan MAMCO account-a sum lut ngei tur anga tarlan a ni a. Chuvang chuan assistant manager a nih angin Richard Vanlalhmangaiha khan a sign ve ngei tur pawh a ni. Sum luhna erawh MAMCO account-ah niloin, Lalremthanga leh Mustaqur Rahman account-ah a lo lut leh daih a ni tih Anti Corruption Bureau-in an chhuichhuak leh vek a, affidavit-a hming sign chungchangah chuan Richard Vanlalhmangaiha hi bum tel a ni ve zawk a ni,” Legal Department hruaitu hian a ti.
He thilah hian Richard Vanlalhmangaiha inhnamhnawih ve nise chuan a lakah case siamsak loh na chhan tur a awm loa, ruling party thiltih theihna a ni tih dawnin, case intan laia ruling party chu Congress an ni a, thubuai ngaihtuah chhoh lai hi MNF party sawrkar lai niin, thuthlukna siam hun pawh MNF party rorel lai a ni tih a sawi a ni.
He case-ah hian accused (thil tisualah puhte chu) a tarlan tak mi pahnih chiah an ni a, Richard Vanlalhmangaiha hi chu prosecution witness (thuhretu) ah a tang zawk tih a sawi bawk.
Tuesday Nighmare Youtube channel-in phone call record a pho chhuahah, mi pakhatin sum an hlan laiin Richie-a leh Remthanga hnenah an hlan thlap zel nia a sawi chungchangah, he mi pakhat hi Tlanghmingthanga ni ngeia an hria thu leh a ni hi MNF ruhkawl tia hriat a nih thu Vanlalsiama Pachuau hian a sawi.
Investigation report leh court judgement atangin a thusawi hi dawt a ni tih a chian thu sawiin, “Hetianga case chinfel tawh, thiam loh changte hriatchian tawh leh hremna pawh pek tawh an nih lai a, case-a tel ve lo, politics inbeihna hmanga tih hmingchhiat tumna leh mipuiin duhthlanna fim hmang theilo tura dawt hmanga inpuhna hi tha lo kan ti a. Court zahawmna tihbawrhbanna leh court rorelna zah lohnaah kan ngai a ni,” a ti.
ZPM Legal Department chuan he thil hi an bawh zui zel dawn a, a hma thei ang berin criminal complaint an thehlut dawn tih a sawi bawk.