ZPM inthlang turah inpawt

Ningani hian sorkarna siamtu party ZPM an inthlang dawn a, an inthlang turah hian kil hrang hrang hrang atangin an inpawt.
Elected office bearer tur hi a chuha chuh lovin floor atanga nomination siamin an thlang dawn a, mahse party pawn atanga hriat theih khawpin social media lamah campaign thawm a ri.
Thu dawn danin, Elected office bearer turah hian thlur nga an awm a, ‘ZNP’ tia sawi te, ‘ZNP lo’ tia sawi te, ‘neutral’ tia sawi te an awm.
Vice president atana thlan theih tur zinga pakhgat Er Vanlalneiha a inhnukdawk a, ani bak inhnukdawk an awm rih lo nia hriat a ni.
Tuna a lan danin, president atan Lalliansawta, vice president atan W Chhuanawma, treasurer atan Lalchhuanthanga te chu line khat an ni a, line dangah president atan VL Zaithanzama, vice president atan C Laltanpuia, treasurer atan SL Ngursailova Sailo te an awm.
President atana VL Zaithanzama ringin line dang pathum an awm: vice president atan Er Vanlalneiha, treasurer atan Saithuama Mangpa te, vice president atan RL Liantluanga leh treasurer atan C Lalchhandami te; vice president atan Lt Col Lalhmingliana (MLA) leh treasurer atan C Lalthanfela. Vice president atan Er Lianlunga a mal kal a, vice president atana thlan theih tur Er Vanlalneiha a inhnuhdawh avangin Saithuama Mangpa a mal kal ta nia hriat a ni bawk.
An party executive committee inthlan zawhah vice president atan mi pahnih ruat tur an ti a, an tling a niha vice president-a an ruat tur hmingte pawh campaign nan an hmang tih thu dawn a ni.
President atana Lalliansawta thlan leh thlan loh chungchangah ngaihdan a phir a, term hnih bak a nih theih loh tih chu an party dana an ziah dan a nih rualin, term liam tur chiah atanga chhiar tan tur tih ngaihdan an awm. Term liam tur atanga chhiar chuan tuna an president ni lai Lalliansawta hi a thlan nawn theih dawn a, mahse term liam tur atanga chhiar tur a nihna a awm lo tih ngaihdan a awm.
Elected office bearer tur leh executive member tur mi 100 an thlang bawk ang.