ZPM leh BJP tang dun, sorkar siam tum

Lai Autonomous District Council (LADC)-ah sorkar thar a la piang lo a, MNF leh Congress tang dunin sorkar siam an tum hnuah ZPM leh BJP an tang dun ve leh. Anni pawh hian sorkar theih an inbeisei.
January ni 9, Zirtawpni khan member paruk nei ZPM leh member pahnih nei BJP te’n thawh hona thuthlung an siam a, LADC-ah sorkarna siam theih an tum.
ZPM lam leader T Zakunga chuan BJP nena an thawh ho tur thu hi a sawi a, sorkar theih pawh an inbeisei thu a sawi.
“Number-ah chuan sorkarna khawp kan la tling lo a, mahse politics-ah chuan bei hi a dawng ngai lo a. Sorkar theih hi kan la beisei a ni,” tiin The Aizawl Post a hrilh.
Independent ticket-a tling mi pahnihte pawh an lama tang tura an ngaih thu a sawi a, sorkar intawm siam theih an beisei thu sawiin, “Tuna sorkar siam tumte’n sorkar siam an tum dan hi, member chu an ngah tawh reng a. Chutih laiin, state sorkar kan belh hi a ngai khawp mai a, central lam nen. Chuvangin kan sorkar hi a ngai tih ngaihdan a awm a ni,” a ti.
MNF leh Congress tang dunin larsap hnenah sorkar an siam theih thu an thlen chu larsap hian pawm se, sorkar siam turin ti se, tichuan an ngah tawk em tih en chhin law law ni se an duh thu a sawi bawk.
Nikum December ni 3-a vote thlak LADC-ah hian MNF-in MDC pariat an nei a, Congress-in pasarih, ZPM-in paruk, BJP-in pahnih an nei. Inpependent ticket-in pahnih an tling bawk. Party mala sorkar thei an awm loh avangin party hrang hrang an indawr a, kar hmasa khan MNF leh Congress te’n tan dun tumin, sorkarna an siam theih thu hi larsap hnenah an thlen a ni. Larsap-in engtin nge a tih dawn a la hriat loh a, chutiang karah chuan ZPM leh BJP te’n tan dun an tum ve leh a, sorkar theih pawh an inbeisei a ni.